चकमक फेम पोलीस अधिकारी प्रदीप शर्मा पुण्यातील ससून रुग्णालयात

सुरक्षिततेच्या कारणांमुळे शर्मा यांना मुंबईतील ऑर्थर रोड कारागृहातून येरवडा कारागृहात हलवण्यात आले आहे. कारागृहात पोटात दुखू लागल्याने त्यांच्यावर प्राथमिक उपचार करण्यात आले. त्यानंतर त्यांना ससून रुग्णालयात दाखल करण्यात आले होते. उपचारानंतर पुन्हा कारागृहात नेल्यावर त्यांची प्रकृती पुन्हा बिघडली. त्यांना पुन्हा रुग्णालयात दाखल करून विविध वैद्यकीय चाचण्या करण्यात आल्या. सध्या त्यांची प्रकृती स्थिर असल्याची माहिती पोलिसांनी दिली.

दरम्यान, अंबानी यांच्या निवासस्थानी स्फोटके सापडल्याचे प्रकरण दोन वर्षांपूर्वी उघडकीस आले. त्यानंतर व्यावसायिक मनसुख हिरेन यांचीही हत्या झाल्याचे उघडकीस आले. या प्रकरणी मुंबई गुन्हे शाखेतील पोलीस अधिकार सचिन वाझे आणि प्रदीप शर्मा यांना अटक करण्यात आली. नालासोपारा मतदारसंघातून शर्मा यांनी गेल्या वेळी शिवसेनेकडून विधानसभेची निवडणूक लढवली होती.