लोकसत्ता प्रतिनिधी
पुणे : आवक वाढल्याने कांदा, ढोबळी मिरची, भुईमुग शेंगांच्या दरात घट झाली. अन्य फळभाज्यांची स्थिर असल्याची माहिती व्यापाऱ्यांनी दिली.
श्री छत्रपती शिवाजी मार्केट यार्डातील घाऊक बाजारात रविवारी राज्य, तसेच परराज्यातून मिळून १०० ट्रक फळभाज्यांची आवक झाली. कर्नाटक, गुजरात, आंध्र प्रदेशातून मिळून ७ ते ८ टेम्पो हिरवी मिरची, कर्नाटक, गुजरातमधून मिळून ४ ते ५ टेम्पो कोबी, कर्नाटक आणि गुजरातमधून मिळून प्रत्येकी ३ ते ४ टेम्पो घेवडा, आंध्र प्रदेश, तमिळनाडूतून मिळून ४ ते ५ टेम्पो शेवगा, राजस्थानातून ८ ते १० टेम्पो गाजर, पंजाब, हिमाचल प्रदेशातील सिमला भागातून मिळून ८ ट्रक मटार, कर्नाटकातून ३ ते ४ टेम्पो पावटा, ३ टेम्पो भुईमुग शेंग, आंध प्रदेशातून ५ ते ६ टेम्पो तोतापुरी कैरी, गुजरात आणि मध्य प्रदेशातून १० ते १२ टेम्पो लसूण अशी आवक परराज्यातून झाली, अशी माहिती मार्केट यार्डातील ज्येष्ठ अडते विलास भुजबळ यांनी दिली.
पुणे विभागातून सातारी आले ५०० ते ६०० गोणी, भेंडी ७ ते ८ टेम्पो, गवार ५ ते ६ टेम्पो, टोमॅटो ९ ते १० हजार पेटी, हिरवी मिरची ४ ते ५ टेम्पो, ढोबळी मिरची ९ ते १० टेम्पो, काकडी ७ ते ८ टेम्पो, कोबी ८ ते १० टेम्पो, फ्लॉवर १० ते १२ टेम्पो, तांबडा भोपळा १० ते १२ टेम्पो, कांदा १२५ ते १५० ट्रक, तसेच इंदूर, आग्रा, स्थानिक भागातून ४० टेम्पो बटाट्याची आवक झाली.
शेपू, कांदापात, चाकवत, राजगिऱ्याच्या दरात वाढ
शेपू, कांदापात, चाकवत, राजगिरा या पालेभाज्यांच्या दरात वाढ झाली. पुदिन्याच्या दरात घट झाली असून, कोथिंबिर, मेथी, करडई, अंबाडी, मुळे, चुका, चवळई, पालक या पालेभाज्यांचे दर स्थिर आहेत. तरकारी विभागात कोथिंबीर ९० हजार जुडी, मेथीच्या ६० हजार जुडींची आवक झाली, अशी माहिती तरकारी विभागातील व्यापाऱ्यांनी दिली. घाऊक बाजारात पालेभाज्यांचे शेकड्याचे दर पुढीलप्रमाणे – कोथिंबीर- १००० ते १५००, मेथी – ८०० ते १२००, शेपू – ८०० ते १०००, कांदापात- ८०० ते १२००, चाकवत – ३०० ते ६००, करडई- ३०० ते ६००, पुदिना – ३०० ते ५००, अंबाडी – ३०० ते ६००, मुळे – ८०० ते १२००, राजगिरा- ४०० ते ७००, चुका – ५०० ते ८००, चवळई- ३००-६००, पालक- ८००- १२००
संत्री, पपई, लिंबू महाग
संत्री, पपई, लिंबांच्या दरात वाढ झाली. खरबूज, पेरुच्या दरात घट झाली आहे. अननस, कलिंगड, मोसंबी, कलिंगड, स्ट्राॅबेरी, चिकूचे दर स्थिर असल्याची माहिती व्यापाऱ्यांनी दिली. फळबाजारात रविवारी मोसंबी ३० ते ४० टन, संत्री ४० ते ५० टन, डाळिंब २० ते २५ टन, पपई १० ते १५ टेम्पो, लिंबे दीड ते दोन हजार गोणी, कलिंगड ७० ते ८० टेम्पो, खरबूज ३० ते ४० टेम्पो, चिकू दोन हजार खोकी, पेरू ३०० ते ४०० प्लास्टिक जाळी (क्रेट), अननस ६ ट्रक अशी आवक झाली.
