पिंपरी: महापालिकेने पूर्वलक्षीप्रभावाने सुरू केलेल्या कचरा सेवा शुल्क वसुलीला राज्य शासनाने स्थगिती दिल्यानंतर कर संकलन विभागाने मालमत्ताकर देयकांच्या संगणक प्रणालीत बदल केला आहे. त्यामुळे मालमत्ताधारकांना कचरा सेवा शुल्क न भरता आपला मूळ कर भरता येणार आहे. मालमत्ताधारकांची कचरा सेवा शुल्कातून तात्पुरती सुटका झाली आहे.
राज्य शासनाच्या नगर विकास विभागाने कचरा सेवा शुल्क वसुलीला तात्पुरती स्थगिती दिली. त्यासंदर्भात मुख्यमंत्र्यांसमवेत बैठक होईपर्यंत शुल्क वसुली न करण्याचे आदेश दिले होते. त्यानंतर आरोग्य विभागाचे सहायक आयुक्त यशवंत डांगे यांनी शासन आदेशाची अंमलबजावणी करावी, अशा सूचना कर संकलन व कर आकारणी विभागाला दिल्या. त्यानंतर कर संकलन विभागाने संगणक प्रणालीत बदल केला. त्यानुसार २६ डिसेंबरपासून नागरिकांच्या ऑनलाइन देयकांमध्ये कचरा सेवा शुल्क स्थगिती आदेशाची अंमलबजावणी सुरू केली आहे. त्यामुळे मालमत्ताधारकांनी थकीत आणि चालू कर भरून महापालिकेला सहकार्य करावे, असे आवाहन सहायक आयुक्त नीलेश देशमुख यांनी केले.
हेही वाचा… येरवडा कारागृहातच खून, कैद्याला कात्रीने भोसकले
राज्य शासनाच्या नगर विकास विभागाने दिलेल्या आदेशानुसार कचरा सेवा शुल्क वसूल करण्यास स्थगिती दिली आहे. त्यानुसार कर संकलन विभागाच्या संगणक प्रणालीत बदल केल्याचे आयुक्त तथा प्रशासक शेखर सिंह यांनी सांगितले.
