मेट्रोचा विचार न करता उड्डाणपुलाची घाई ; मेट्रो मार्गिकेसाठी अडचण ठरण्याची शक्यता

सिंहगड रस्त्यावरील वाहतुकीची कोंडी फोडण्यासाठी राजाराम पूल ते फनटाइम चित्रपटगृह या दरम्यान उड्डाणपूल प्रस्तावित आहे. या उड्डाणपुलाची प्राथमिक कामे दोन महिन्यांपूर्वी सुरू झाली. कामे सुरू असतानाच उड्डाणपुलाच्या रचनेत बदल करण्याचा प्रस्ताव मंजूर करण्यात आला आहे. भविष्यातील मेट्रो मार्गिकेचा विचार करून उड्डाणपुलाच्या खांबांबरोबरच मेट्रो मार्गिकेसाठी आवश्यक खांबांची उभारणी करण्यात यावी, असा हा प्रस्ताव आहे. मात्र त्यानंतरही उड्डाणपुलासाठीचे आवश्यक खांब उभारणीची प्रक्रिया सुरू झाली असून पाच ते सहा खांब उभे राहण्यास सुरुवात झाली आहे.

उड्डाणपुलाच्या भूमिपूजनावेळी केंद्रीय भुपृष्ठ आणि दळणवळण मंत्री नितीन गडकरी यांनी दुमजली उड्डाणपूल उभारावा, अशी सूचना केली होती. उड्डाणपूल दुमजली करता येईल का, ही चाचपणी करण्यास महापालिका अधिकाऱ्यांनी काही दिवस घेतले. दुमजली उड्डाणपूल उभारणी खर्चिक असल्याचे लक्षात आल्याने हा प्रस्ताव मागे पडला. त्यानंतर उड्डाणपुलाची प्राथमिक कामे सुरू झाली.

सिंहगड रस्त्यावरील प्रस्तावित मेट्रो मार्गिकेचा प्राथमिक आराखडा महाराष्ट्र मेट्रो रेल्वे कॉर्पोरेशनकडून करण्यात आला आहे. मात्र तो अद्याप महापालिकेला सादर करण्यात आलेला नाही. प्राथमिक आराखडा सादर झाल्यानंतर महापालिकेची त्याला मंजुरी घ्यावी लागणार आहे. या प्रक्रियेत काही महिने जाण्याची शक्यता आहे. त्यातच खर्चाचे दायित्व कोणी घ्यायचे याबाबतही स्पष्टता नाही. मेट्रो मार्गिकेचा विचार करून उड्डाणपुलाची रचना करावी, असे महाराष्ट्र मेट्रो रेल्वे कॉर्पोरेशनकडूनही स्पष्ट करण्यात आले आहे. मेट्रो आणि उड्डाणपुलाचे खांब एकत्रित उभारण्यास तत्त्वत: मंजुरी देण्यात आली आहे. मेट्रोसाठी खांब हे प्रामुख्याने उड्डापूल उतरण्याच्या रॅम्पजवळ येत असून सहा खांब उड्डाणपुलाच्या खांबांजवळ येणार आहेत. मेट्रोचे खांब उभारायचे झाल्यास उड्डाणपुलाचे रॅम्प तोडावे लागण्याची शक्यता आहे. मेट्रोसाठी सुमारे १०३ खांबांची उभारणी करावी लागणार आहे. मात्र या परिस्थितीचा विचार न करता उड्डाणपुलाच्या काम दामटण्यात येत आहे.

पर्यायी मार्ग दुर्लक्षित

सिंहगड रस्त्याला पर्यायी रस्ता नाही. त्यामुळे या रस्त्यावर वाहतुकीची सातत्याने कोंडी होत असल्याचे वेळोवेळी दिसून आले आहे. पर्यायी रस्ते नसतानाही राजाराम पूल ते फनटाइम चित्रपटगृह या दरम्यानच्या उड्डाणपुलाचे काम महापालिकेकडून हाती घेण्यात आले आहे. उड्डाणपुलाच्या कामामुळे वाहतूक कोंडी होणार असल्याने आधी पर्यायी रस्ते मार्गी लावा, असे पोलिसांकडूनही महापालिकेला सांगण्यात आले होते. अद्यापही पर्यायी रस्ते नसल्याने सिंहगड रस्ता परिसरात वाहतुकीची कोंडी होते. मात्र पर्यायी रस्त्यांना गती देण्याची प्रक्रिया संथ गतीने सुरू आहे.