पुणे : महाराष्ट्र लोकसेवा आयोगातर्फे (एमपीएससी) महाराष्ट्र दुय्यम सेवा गट ब मुख्य परीक्षा २०२२ अंतर्गत पोलीस उपनिरीक्षक (पीएसआय) पदासाठीची सर्वसाधारण गुणवत्ता यादी जाहीर करण्यात आली. त्यात सातारा जिल्ह्यातील दिवड येथील अमोल घटुकडे यांनी राज्यात पहिला क्रमांक पटकावला. एकनाथ अर्जुन लाठे यांनी द्वितीय, अविनाश जालिंदर आवारे यांनी तृतीय क्रमांक मिळवला.
एमपीएससीने प्रसिद्धिपत्रकाद्वारे ही माहिती दिली. चार पदे राखून ठेवून उर्वरित ५९९ पदांसाठीची सर्वसाधारण गुणवत्ता यादी जाहीर करण्यात आली. उमेदवारांच्या अर्जातील विविध दाव्यांच्या अनुषंगाने गुणवत्ता यादी तयार करण्यात आली आहे. अंतिम निकालापूर्वी पडताळणीअंती काही उमेदवारांच्या दाव्यांमध्ये, शिफारसींमध्ये बदल होऊ शकतो. खेळाडू आणि अनाथ प्रवर्गातून अर्ज केलेल्या उमेदवारांची प्रमाणपत्रे प्राधिकृत अधिकाऱ्यांकडून पडताळणीच्या अधीन राहून त्यांचा खेळाडू, अनाथ प्रवर्गाचा दावा तात्पुरता ग्राह्य धरून त्यांचा गुणवत्ता यादीत समावेश करण्यात आला आहे.
हेही वाचा – शीव उड्डाणपुलावरील वाहतूक बंद, प्रवासाचा वेळ वाढला
खेळाडू आणि अनाथ प्रवर्गातील उमेदवारांच्या प्रमाणपत्रांची पडताळणी झाल्यावर या संवर्गाची तात्पुरती निवडयादी आणि भरती प्रक्रियेतून बाहेर पडण्याचा पर्याय (ऑप्टिंग आऊट) उपलब्ध करून दिला जाईल. ऑप्टिंग आऊट, आरक्षण विचारात घेऊन अंतिम निवडयादीच्या आधारे उमेदवारांच्या शिफारसी केल्या जातील. संबंधित गुणवत्ता यादी न्यायालयात, न्यायाधिकरणात दाखल विविध न्यायिक प्रकरणांतील न्यायनिर्णयाच्या अधीन राहून जाहीर करण्यात आली आहे. न्यायिक प्रकरणातील आदेशामुळे यादीत बदल होऊ शकतो, असे स्पष्ट करण्यात आले आहे.
