पुणे : भरधाव मोटारीची वानवडी परिसरात ज्येष्ठ दाम्पत्याला धडक; महिलेचा मृत्यू

भरधाव मोटारीने पादचारी ज्येष्ठ दाम्पत्याला धडक दिल्याची घटना वानवडीत घडली. अपघातात पादचारी ज्येष्ठ महिलेचा मृत्यू झाला असून पती जखमी झाले आहेत. या प्रकरणी मोटारचालकास अटक करण्यात आली. विश्वंभरी नरेंद्रसिंग नेगी (वय ६०, रा. तात्या टोपे सोसायटी, वानवडी) असे मृत्युमुखी पडलेल्या महिलेचे नाव आहे. अपघातात नरेंद्रसिंग नेगी (वय ६३) जखमी झाले आहेत. त्यांच्यावर खासगी रुग्णालयात उपचार सुरु आहेत. याबाबत नेगी यांचा मुलगा डॅा. पंकजसिंग नेगी (वय ३२) यांनी वानवडी पोलीस ठाण्यात फिर्याद दिली आहे. या प्रकरणी मोटारचालक पोपट निवृत्ती मदने (वय ४०, रा. सुरक्षानगर, वैदुवाडी, हडपसर) याला अटक करण्यात आली आहे.