नियोजित गृहप्रकल्पातील सोळाव्या मजल्यावरुन पडून बांधकाम मजूर महिलेचा मृत्यू झाल्याची घटना सिंहगड रस्त्यावरील जयदेवनगर परिसरात घडली. सुरक्षाविषयक उपाययोजना न केल्याने बांधकाम ठेकेदाराच्या विरोधात दत्तवाडी पोलिसांनी गुन्हा दाखल केला. मीनाकुमारी साहू (वय ४१) असे मृत्यूमुखी पडलेल्या बांधकाम मजूर महिलेचे नाव आहे. दुर्घटनेस जबाबदार ठरल्या प्रकरणी ठेकेदार पवार शंकर भाई रेड्डी याच्या विरोधात गुन्हा दाखल करण्यात आला आहे. पोलीस उपनिरीक्षक राणी शिंदे यांनी या संदर्भात दत्तवाडी पोलीस ठाण्यात फिर्याद दिली आहे. साहू मूळची छत्तीसगडमधील आहे. सिंहगड रस्त्यावरील जयदेवनगर परिसरात नियोजित गृहप्रकल्पाचे काम सुरू आहे. सोळाव्या मजल्यावर फरशी बसविवण्याचे काम सुरू होते. त्या वेळी तोल गेल्याने साहू सोळाव्या मजल्यावरुन इमारतीच्या आवारातील चरात (डक्ट) पडली. गंभीर जखमी झालेल्या साहूचा उपचारांपूर्वीच मृत्यू झाला. याप्रकरणी दत्तवाडी पोलीस ठाण्यात आकस्मिक मृत्यू अशी नोंद करण्यात आली होती. चौकशीत ठेकेदाराने सुरक्षाविषयक उपाययोजना न केल्याने दुर्घटना घडल्याचे उघडकीस आले. त्यानंतर या प्रकरणी ठेकेदाराच्या विरोधात गुन्हा दाखल करण्यात आला.
