पुणे : घरगुती गॅस सिलिंडरचा साठा करून त्याची बेकायदा विक्री करण्यात येत असल्याचा प्रकार सिंहगड रस्ता पोलिसांनी उघडकीस आणला. याप्रकरणी पोलिसांनी एकाला अटक केली असून, त्याच्याकडून टेम्पोसह ६१ सिलिंडर जप्त करण्यात आले आहेत.
विकास धोंडाप्पा आकळे (वय ३१, सध्या रा. चरवड वस्ती, वडगाव बुद्रुक, मूळ. रा. सोलापूर) असे अटक करण्यात आलेल्याचे नाव आहे. आकळे याच्याविरुद्ध दोन महिन्यांपूर्वी कारवाई करण्यात आली होती. सिंहगड रस्ता पोलिसांचे पथक वडगाव बुद्रुक भागात गस्त घालत होते. त्यावेळी एकाने बेकायदा सिलिंडरचा साठा करुन ठेवल्याची माहिती पथकाला मिळाली. पथकाने सापळा लावला. त्यावेळी सिलिंडर ठेवलेला टेम्पो आढळून आला. पोलिसांनी आकळेला ताब्यात घेतले. तेव्हा त्याने बेकायदा सिलिंडरचा साठा करुन ठेवल्याचे स्पष्ट झाले. त्याने सिलिंडर कोणाकडून आणले, तसेच त्याची विक्री कुठे केली? याबाबतचा तपास सिंहगड रस्ता पोलिसांकडून करण्यात येत आहे.
हेही वाचा – पिंपरी : भोसरी एमआयडीसीतील प्लास्टिक कंपनीला भीषण आग
सिंहगड रस्ता पोलीस ठाण्याचे वरिष्ठ पोलीस निरीक्षक दिलीप दाईंगडे, गुन्हे शाखेचे निरीक्षक उत्तम भजनावळे यांच्या मार्गदर्शनाखाली सहायक निरीक्षक सचिन निकम, उपनिरीक्षक संतोष भांडवलकर आणि पथकाने ही कारवाई केली.
