जिल्ह्यात ३१२ जणांना नव्याने संसर्ग

शुक्रवारी दिवसभरात आढळलेल्या ३१२ नवीन रुग्णांपैकी १८५ रुग्ण पुणे महापालिका क्षेत्रात आहेत. ७९ रुग्ण पिंपरी-चिंचवड महापालिका क्षेत्रात, तर ४८ रुग्ण जिल्ह्याच्या उर्वरित भागात आढळले आहेत. शुक्रवारी जिल्ह्यात एकाही रुग्णाचा मृत्यू झाला नाही, अशी माहिती आरोग्य विभागाकडून देण्यात आली. करोनाचा  प्रसार रोखण्यासाठी विशेषत: जोखीम गटातील रुग्ण, सहव्याधीग्रस्त आणि ज्येष्ठ नागरिकांनी तसेच लसीकरण न झालेल्या नागरिकांनी मुखपट्टी वापरासह सर्व आवश्यक खबरदारी घेण्याचे आवाहन करण्यात येत आहे. शुक्रवारी आढळलेल्या ३१२ नव्या रुग्णांमुळे पुणे जिल्ह्यातील एकूण करोना रुग्णसंख्या १४ लाख ९३ हजार ४७२ एवढी झाली आहे.