पुणे : फेरीवाला दिसताच रेल्वेचा दंडुका! दीड महिन्यांत ७४ जणांवर कारवाई

पुणे रेल्वे स्थानक परिसरात अनेक अनधिकृत विक्रेते, फेरीवाले व्यवसाय करीत आहेत. ते खाद्यपदार्थांवरील छापील कमाल किमतीऐवजी जास्त पैसे प्रवाशांकडून उकळतात. पाण्याच्या बाटलीची विक्रीही जादा दराने केली जाते. तसेच अनधिकृत कंपन्यांच्या उत्पादनांची विक्रीही केली जाते. याबाबत अनेक प्रवाशांनी तक्रारी करून विक्रेते आणि फेरीवाले यांच्यावर कारवाईची मागणी केली. त्यानुसार रेल्वेने अनधिकृत विक्रेते आणि फेरीवाले यांच्यावर कारवाई केली.

हेही वाचा >>> पुणे: आत्महत्याग्रस्त शेतकऱ्यांच्या मुला-मुलींच्या स्वप्नांना बळ! ‘श्रम विद्या’ शैक्षणिक कर्ज योजना 

या मोहिमेदरम्यान ७४ अनधिकृत विक्रेत्यांवर कारवाई करून त्यांना रेल्वे सुरक्षा दलाच्या हवाली करण्यात आले. अनधिकृत पाण्याच्या २ हजार ७४८ बाटल्या जप्त करण्यात आल्या आहेत. हे सर्व अनधिकृत विक्रेते पुणे स्थानकावर विनापरवाना खाद्यपदार्थ आणि पाण्याच्या बाटल्यांची विक्री करीत होते. रेल्वे न्यायालयाने या विक्रेत्यांना ४९ हजार ८०० रुपयांचा दंड ठोठावला. सहायक वाणिज्य व्यवस्थापक अजयकुमार यांच्या नेतृत्वाखाली तिकीट तपासणी, अन्नपदार्थ निरीक्षक कर्मचारी व रेल्वे सुरक्षा दलाने ही कारवाई केली.

रेल्वे स्थानकाच्या आवारात अनधिकृत विक्रेत्यांचे प्रमाण वाढले होते. वाणिज्य विभागाकडून सातत्याने कारवाई सुरू असल्याने हे प्रमाण आता कमी झाले आहे. – डॉ.मिलिंद हिरवे, वरिष्ठ विभागीय वाणिज्य व्यवस्थापक