पुणे : घरगुती ग्राहकांच्या वीजदरात कपात

दिवसातील कोणत्या वेळी किती वीज वापरण्यात आली, त्यानुसार विजेचे दर ठरवण्यासाठी वापरण्यात येत असलेल्या स्वयंचलित प्रणालीला तांत्रिक भाषेत ‘टीओडी’ म्हणजेच टाईम ऑफ डे असे म्हणतात. ही प्रणाली आतापर्यंत केवळ औद्योगिक ग्राहकांसाठीच वापरण्यात येत होती. मात्र, नव्या नियमांनुसार घरगुती ग्राहकांसाठीही ‘टीओडी’ प्रणाली वापरण्यात येणार आहे आणि केवळ ‘टीओडी मीटर’ असलेल्या घरगुती ग्राहकांनाच सकाळी सहा ते नऊ या वेळेत वीज वापरावर प्रति युनिट ८० पैसे ते १ रुपयापर्यंत सवलत देण्यात येणार आहे.

‘सौरऊर्जेद्वारे निर्माण झालेली वीज स्वस्तात मिळत असल्यामुळे महावितरणला विजेचे दर कमी करणे शक्य होणार आहे. सौरऊर्जा वीज दिवसा मिळते. त्यामुळे दिवसा वीज वापरणाऱ्या घरगुती ग्राहकांना सवलत देण्याचा प्रस्ताव मांडला आहे. या सवलीतींचा कोणताही आर्थिक ताण महावितरणवर पडणार नाही. याउलट ‘टीओडी’ सारख्या सुविधांमुळे ग्राहकांसोबतच कंपनीलाही फायदाच होईल,’ असेही अधिकाऱ्यांनी सांगितले.

महावितरणकडून ‘टीओडी मीटर’ मोफत

घरगुती ग्राहकांना ‘टीओडी’ सवलतींचा लाभ घेता यावा म्हणून महावितरणकडून मोफत टीओडी मीटर बसवून देण्यात येणार आहेत. त्यासाठी केंद्र सरकारकडून अनुदान मिळणार असून, नव्या मीटरचा कोणताही आर्थिक भुर्दंड महावितरण व वीजग्राहकांवर स्वतंत्रपणे पडणार नाही. या नवीन मीटरसाठी महावितरणकडून कोणतेही कर्ज काढण्यात आलेले नाही. कोणताही अतिरिक्त वीज दर आकारण्यात येणार नाही. पर्यायाने नव्या मीटरमुळे वीज दरवाढीवर कोणताही परिणाम होणार नाही. तसेच ग्राहकांच्या मागणीनंतर हे नवे डिजीटल मीटर ‘प्रीपेड’ करण्याची सक्तीही करण्यात येणार नाही, अशी माहिती महावितरणकडून देण्यात आली आहे.