पुणे : पुणे मेट्रोच्या विस्तारित सेवेला प्रवाशांनी स्वातंत्र्यदिनी मोठा प्रतिसाद दिला. मेट्रोने मंगळवारी (ता.१५) एकूण १ लाख २३ हजार जणांनी प्रवास केला. मेट्रोची आतापर्यंतची ही उच्चांकी प्रवासी संख्या आहे.
पिंपरी-चिंचवड महापालिका ते जिल्हा न्यायालय मार्गावर मंगळवारी ६१ हजार ८३४ प्रवासी होते. वनाझ ते रुबी हॉल या मार्गावर ६१ हजार ८८६ प्रवासी संख्या होती. आता मेट्रोने १ लाख २३ हजारांची उच्चांकी प्रवासी संख्या नोंदविली आहे. याआधी मेट्रोने ६ ऑगस्टला ९६ हजार ४९८ एवढी उच्चांकी प्रवासी संख्या नोंदविली होती. मेट्रोची विस्तारित सेवा सुरू झाल्यापासून रोजची सरासरी प्रवासी संख्या सुमारे ३५ हजारांवर गेली आहे.
हेही वाचा >>> चंद्रकांतदादा पाटील यांच्या भेटीनंतर गौरव बापट यांचे पुणे लोकसभा पोटनिवडणुकीबाबत भाष्य, म्हणाले…
मेट्रोची विस्तारित सेवा १ ऑगस्टला सुरू झाली. वनाझ ते रुबी हॉल हा ९.७ किलोमीटरचा मार्ग सुरू झाला आहे. आधी या मार्गावर वनाझ ते गरवारे स्थानकापर्यंत सेवा सुरू होती. नंतर गरवारे ते रुबी हॉल स्थानकापर्यंत सेवेचा विस्तार झाला. याचवेळी पिंपरी-चिंचवड महापालिका ते जिल्हा न्यायालय हा १३.९ किलोमीटरचा मार्ग सुरू झाला. आधी पिंपरी-चिंचवड महापालिका ते फुगेवाडी हा मार्ग होता. नंतर हा मार्ग फुगेवाडीपासून जिल्हा न्यायालयापर्यंत विस्तारला.
सर्वाधिक गर्दीची मेट्रो स्थानके
१) पिंपरी-चिंचवड महापालिका : १८,३४९
२) जिल्हा न्यायालय : १७,३७२
३) वनाझ : ११,५८५
४) रुबी हॉल : ११,४६१
५) शिवाजीनगर : १०,७३०
