पुणे : आपला परिसर आणि तरंगिणी सांस्कृतिक प्रतिष्ठान यांच्यातर्फे आयोजित देशभरातील संगीत महोत्सवात मानाचे स्थान प्राप्त केलेला पंडित जितेंद्र अभिषेकी संगीत महोत्सव यंदा २१ ते २३ मार्चदरम्यान होणार आहे.
कोथरूड येथील यशवंतराव चव्हाण नाट्यगृहात माजी केंद्रीय मंत्री प्रकाश जावडेकर यांच्या हस्ते शुक्रवारी (२१ मार्च) सायंकाळी पाच वाजता महोत्सवाचे उद्घाटन करण्यात येणार आहे. माजी विरोधी पक्षनेते उज्ज्वल केसकर यांनी मंगळवारी पत्रकार परिषदेत ही माहिती दिली. पं. जितेंद्र अभिषेकी यांचे पुत्र-शिष्य आणि तरंगिणी सांस्कृतिक प्रतिष्ठानचे पं. शौनक अभिषेकी, आपला परिसरचे महेश पानसे आणि विद्येश रामदासी, पं. जितेंद्र अभिषेकी यांचे शिष्य पं. हेमंत पेंडसे या वेळी उपस्थित होते.
महोत्सवात ज्येष्ठ गायक, अभिनेते शेखर सेन यांना यंदाचा ‘पंडित जितेंद्र अभिषेकी पुरस्कार’ देऊन गौरविण्यात येणार आहे. सुभाष कामत यांना ‘ज्येष्ठ संगीतकार पुरस्कार’, तर ज्येष्ठ लेखिका शैला मुकुंद यांना पहिल्या ‘विद्या जितेंद्र अभिषेकी पुरस्कारा’ने सन्मानित करण्यात येणार आहे. उद्घाटनानंतर शौनक अभिषेकी, डॉ. सलील कुलकर्णी, संदीप खरे, वैभव जोशी या कलाकारांचा ‘हे बंध रेशमाचे’ हा कार्यक्रम सादर करण्यात येणार आहे. महोेत्सवाच्या दुसऱ्या दिवशी सायंकाळी पाच वाजता केंद्रीय मंत्री मुरलीधर मोहोळ यांच्या हस्ते कथक कलाकार पं. राजेंद्र गंगाणी, गायक इंद्राणी मुखर्जी यांचा सत्कार करण्यात येणार आहे. तिसऱ्या दिवशी भजनसम्राट अनुप जलोटा यांचा सत्कार उच्च व तंत्रशिक्षणमंत्री चंद्रकांत पाटील यांच्या हस्ते करण्यात येणार असून, जलोटा यांच्या गायनाने महोत्सवाची सांगता होणार असल्याचेही केसकर यांनी सांगितले.
पं. जितेंद्र अभिषेकी म्हणजे गोव्याच्या भूमीतील प्रतिभासंपन्न गायक कलाकार ज्यांनी शास्त्रीय संगीतामध्ये आपले वेगळे स्थान निर्माण केले. या महान कलाकारच्या स्मृतीनिमित्ताने या महोत्सवाचे आयोजन केले जाते. महोत्सवात देशविदेशातील कलाकार, अभिषेकी यांचे शिष्य, सहभागी होणार आहेत. २२ आणि २३ मार्चला सायंकाळच्या सत्रात ज्येष्ठ कथक नर्तक पं. राजेंद्र गंगाणी, गायिका इंद्राणी मुखर्जी, ज्येष्ठ गायक पं. मधुप मुदगल, समीर दुबळे, संतूरवादक अभय सोपोरी आणि भजनसम्राट अनुप जलोटा यांचे सादरीकरण होणार आहे. या दोन्ही दिवशी सकाळी ९ वाजता युवा कलाकारांचे सादरीकरण होणार असून त्यात करण देवगांवकर, अमन वरखेडकर, श्रुती विश्वकर्मा, रागेश्री वैरागकर, ईशान घोष आणि अनिरुद्ध ऐठ्ठल यांचे सादरीकरण होणार आहे. हा महोत्सव सर्वांसाठी खुला आहे. त्यामुळे या संगीत महोत्सवात पुणेकरांनी मोठ्या संख्येने उपस्थित राहावे, असे आवाहनही केसरकर यांनी केले.
