पुणे : सर्व संघटनांचे वैचारिक स्वातंत्र्य अबाधित राखून विद्यापीठाशी संबंधित त्यांचे प्रश्न मार्गी लावण्यात येणार आहेत. संघटनांकडून होणारी आंदोलने, सभा, कार्यक्रम आदींसाठी सर्वसंमतीने नवीन कार्यपद्धत विकसित करण्याचा निर्णय घेण्यात आला आहे . गेल्या काही दिवसांत विद्यापीठात विद्यार्थी संघटनांमध्ये झालेली हाणामारी, राजकीय वादाच्या पार्श्वभूमीवर शनिवारी विद्यापीठातर्फे पोलिस, विद्यार्थी, शिक्षक, शिक्षकेतर कर्मचारी संघटना यांच्यासोबत सुसंवाद बैठक झाली.
कुलगुरू डॉ. सुरेश गोसावी, प्र-कुलगुरु डॉ. पराग काळकर, पोलीस आयुक्त रीतेशकुमार अतिरिक्त सहायक पोलिस आयुक्त रंजन शर्मा, माजी पोलीस सहसंचालक जयंत उमराणीकर, प्रभारी कुलसचिव डॉ. विजय खरे, व्यवस्थापन परिषद सदस्य रवींद्र शिंगणापूरकर, डॉ. नितीन घोरपडे, डॉ. देविदास वायदंडे, बागेश्री मंठाळकर, अधिसभा सदस्य प्रसेनजित फडणवीस, विद्यापीठाचे सुरक्षा संचालक सुरेश भोसले या वेळी उपस्थित होते.
आंदोलन, अनुचित प्रकाराबाबत विद्यार्थ्यांवर गुन्हे दाखल करण्याची पोलिसांची इच्छा नसते. मात्र, काहीवेळा अपरिहार्य कारणामुळे ती वेळ येते. त्यामुळे विद्यार्थ्यांनी काळजी घेऊनच लोकशाही मार्गाने सहभागी व्हावे, असे रितेशकुमार यांनी सांगितले. विद्यार्थ्यांनी कायद्याच्या चौकटीत राहून सर्व प्रक्रियांचे पालन केल्यास पोलीस प्रशासन कोणतीही कारवाई करणार नसल्याची हमी शर्मा यांनी दिली.
हेही वाचा : VIDEO: शरद पवार समर्थकांनी नामदेव जाधवांच्या तोंडाला फासलं काळं
विद्यार्थी आणि कर्मचारी संघटनेच्या प्रतिनिधींनीही त्यांच्या भावना व्यक्त केल्या. सर्व प्रतिनिधींचा समावेश करून सर्वसमावेशक कार्यप्रणाली विकसित करण्याचा निर्णय या बैठकीत घेण्यात आला. विद्यार्थी हा विद्यापीठाच्या शैक्षणिक संकुलाचा कणा आहे. त्यामुळे त्यांच्यासोबतच्या समन्वयानेच विद्यापीठाची भविष्यात प्रगती होणार आहे, असे डॉ. गोसावी यांनी सांगितले.
