पुण्यात पोलिसांकडून ५३ लाख रूपयांचे हेरॉईन जप्त

पुणे पोलिसांनी मंगळवारी केलेल्या कारवाईत ५३ लाख रूपये किंमतीचे हेरॉईन जप्त करण्यात आले. पुणे- बंगळुरू महामार्गावरील हॉटेल डेक्कन पॅव्हेलियनजवळ असलेल्या नवले ब्रिजजवळ ही कारवाई करण्यात आली. यावेळी पोलिसांनी हेरॉईनची तस्करी करणाऱ्या विशाल पोपटभाई पटेल या इसमाला ताब्यात घेतले. वरिष्ठ पोलीस निरीक्षक राजेंद्र कदम यांच्या मार्गदर्शनाखाली दरोडा प्रतिबंधक पथकाने ही कारवाई केली. यावेळी पोलिसांना आरोपी विशाल पटेलकडे तब्बल ५३ लाख रूपये किंमतीचे ३८० ग्रॅम हेरॉईन सापडले. पोलिसांनी सध्या विशाल पटेलला ताब्यात घेतले असून त्याची चौकशी सुरू आहे. त्याच्यावर अंमली पदार्थ प्रतिबंधक कायद्यातंर्गत गुन्हा दाखल करण्यात आला आहे.