पुणे : खडकवासला धरणातून १४ हजार क्युसेकने विसर्ग; पाणीसाठा ९८ टक्क्यांवर

 सध्या चारही धरणांमधील पाणीसाठा ९८ टक्क्यांवर पोहोचला आहे. शनिवारी रात्रीपासून रविवारी सकाळपर्यंत टेमघर धरण क्षेत्रात ५५ मिलिमीटर, वरसगाव धरण परिसरात ४२ मि.मी, पानशेत धरण परिसरात ४५ मि.मी, तर खडकवासला धरण क्षेत्रात पाच मि.मी. पाऊस पडला. खडकवासला धरणातून मुठा नदीत रात्री दहा वाजल्यापासून १८ हजार ४९१ क्युसेकने पाणी सोडण्यात आले. मात्र, रविवारी सकाळपर्यंत चारही धरणांच्या परिसरात पावसाचा जोर काहीसा कमी झाला. त्यामुळे हा विसर्ग १४ हजार ८०१ क्युसेकपर्यंत कमी करण्यात आला आहे, असे खडकवासला धरण साखळी प्रकल्पाचे सहायक अभियंता यो.स.भंडलकर यांनी सांगितले.

प्रमुख धरणांमधील पाणीसाठा टीएमसी, टक्क्यांत –

टेमघर                   ३.२८      ८८.४८
वरसगाव               १२.८२    १००
पानशेत                 १०.६५    १००
खडकवासला        १.९७      १००
एकूण                   २८.७२   ९८.५३

धरणांना तिरंगी विद्युत रोषणाई –

स्वातंत्र्याच्या अमृतमहोत्सवानिमित्त खडकवासला धरणसाखळी प्रकल्पातील वरसगाव, पानशेत आणि खडकवासला या तीन धरणांना तिरंगी विद्युत रोषणाई करण्यात आली आहे. सध्या या तिन्ही धरणांमधून पाण्याचा विसर्ग सुरू आहे. त्यामुळे हे मनमोहक दृश्य पाहण्यासाठी अनेक नागरिक धरण परिसरात गर्दी करत आहेत.