पुणे : भरधाव मोटारीच्या धडकेत दुचाकीस्वार अल्पवयीनाचा मृत्यू झाल्याची घटना येरवड्यातील गोल्फ क्लब रस्त्यावर घडली. अपघातात दुचाकीस्वार अल्पवयीनाबरोबर असलेली सहप्रवासी मैत्रीण जखमी झाली. अपघातानंतर पसार झालेल्या मोटारचालकाचा पोलिसांकडून शोध घेण्यात येत आहे. अपघातात मृत्युमुखी पडलेला १४ वर्षीय मुलगा येरवड्यातील कामराजनगर भागात राहायला आहे. त्याच्याबरोबर असलेली सहप्रवासी मैत्रीण जखमी झाली. याबाबत अल्पवयीनाच्या वडिलांनी येरवडा पोलीस ठाण्यात फिर्याद दिली आहे. याप्रकरणी मोटारचालकाविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, दुचाकीस्वार अल्पवयीन आणि त्याची मैत्रीण सोमवारी (१४ एप्रिल) दुपारी तीनच्या सुमारास येरवडा भागातील एका जलतरण तलावात पोहण्यासाठी निघाले होते. गोल्फ क्लब चौकाकडे जाणाऱ्या रस्त्यावर भरधाव मोटारीने दुचाकीला पाठीमागून धडक दिली. अपघातात दुचाकीस्वार अल्पवयीन आणि त्याच्याबरोबर असलेली सहप्रवासी मैत्रीण गंभीर जखमी झाले. दोघांना तातडीने खासगी रुग्णालयात दाखल करण्यात आले. उपचारादरम्यान मुलाचा मृत्यू झाला.
अपघातानंतर पसार झालेल्या मोटारचालकाचा शोध घेण्यात येत आहे. पोलिसांनी गोल्फ क्लब चौक परिसरातील सीसीटीव्ही चित्रीकरण तपासले आहे. वरिष्ठ पोलीस निरीक्षक रवींद्रकुमार शेळके यांनी घटनास्थळी भेट दिली. पोलीस उपनिरीक्षक नंदकुमार केकाण तपास करत आहेत.
अल्पवयीनांना वाहन देणे धोकादायक
अल्पवयीनांना दुचाकी, तसेच मोटार चालविण्यास देणे कायद्याने गुन्हा आहे. अनेक पालक मुलांना दुचाकी, मोटार चालविण्यास देतात. पालकांच्या बेजबाबदारपणामुळे गंभीर स्वरूपाच्या दुर्घटना घडतात. यापूर्वी पोलिसांनी अल्पवयीनांना दुचाकी चालविण्यास देणाऱ्या पालकांविरुद्ध गुन्हे दाखल केले आहेत.
अपघातात महिला जखमी
अन्य एका अपघातात मोटारीच्या धडकेत दुचाकीस्वार महिला गंभीर जखमी झाल्याची घटना लोहगाव परिसरात घडली. याप्रकरणी मोटारचालकाविरुद्ध विमानतळ पोलिसांनी गुन्हा दाखल केला. मंगल रामराव काळे (वय ४२, रा. मोझेनगर, लोहगाव) असे गंभीर जखमी झालेल्या दुचाकीस्वार महिलेचे नाव आहे. याबाबत काळे यांचे पती रामराव दत्तराव काळे (वय ५२) यांनी विमानतळ पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, मोटारचालक ज्ञानेश्वर आसाराम काळे (वय ३६, रा. तनिष्का वाटिका सोसायटी, आळंदी) याच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, दुचाकीस्वार मंगल काळे या ११ एप्रिल रोजी सायंकाळी सव्वासातच्या सुमारास कामावरून घरी निघाल्या होत्या. लोहगाव येथील डी. वाय. पाटील महाविद्यालय रस्त्यावर भरधाव मोटारीने पाठीमागून दुचाकीस्वार काळे यांना धडक दिली. अपघातात काळे यांना गंभीर दुखापत झाली. काळे यांच्या डोळ्यांना इजा पोहोचली, तसेच त्यांची हनुवटी आणि खुबा फ्रॅक्चर झाल्याची माहिती पोलिसांनी दिली. पोलीस हवालदार नीलेश साळवे तपास करत आहेत.