पुणे : बाणेर टेकडीवर फिरायला आलेल्या इशान्येकडील राज्यातील तीन तरुणींना कोयत्याचा धाक दाखवून त्यांच्याकडील मोबाइल, तसेच मुद्देमाल लुटून पसार झालेल्या चोरट्याला पोलिसांनी गजाआड केले. चोरट्याबरोबर असलेल्या अल्पवयीन साथीदारांना पोलिसांनी ताब्यात घेतले.
द्रापेत उर्फ विशाल प्रभाकर समुखराव (वय १९, रा. कुंभार चाळ, बोराडेवाडी, चिखली, मूळ रा. म्हाळुंगी, ता. चाकूर, जि. लातूर) असे अटक करण्यात आलेल्याचे नाव आहे. याप्रकरणी आरोपी विशालबरोबर असलेल्या दोन अल्पवयीनांना ताब्यात घेण्यात आले. त्यांच्याकडून दुचाकी आणि कोयता जप्त करण्यात आला आहे.
हेही वाचा – पुण्यातील चार जागांवरून महाविकास आघाडीत तिढा
u
बाणेर टेकडीवर १३ ऑक्टोबर रोजी सायंकाळी अबिनीयू खांगबबो चवांग (वय ३६, सध्या रा. रोहन निल सोसायटी, बाणेर), तिची मैत्रीण चिंगमलिऊ पामेई, अपर पामेई फिरायला गेल्या होत्या. त्यावेळी आरोपी विशाल आणि त्याच्याबरोबर असलेल्या अल्पवयीन साथीदारांनी तिघींना कोयत्याचा धाक दाखवून त्यांच्याकडील महागडे मोबाइल संच, इअर बड्स, पिशवी असा मुद्देमाल लुटला होता. अबिनीयू, चिगमलिऊ, अपर मूळच्या नागालँडमधील आहेत. अबिनीयू आणि चिगमलिऊ एका बीपीओत कामाला आहेत. चोरट्यांनी कोयत्याचा धाकाने त्यांना लुटल्यानंतर घाबरलेल्या तिघींनी पोलिसांकडे धाव घेऊन तक्रार नोंदविली. या घटनेची माहिती मिळताच पोलिसांनी घटनास्थळी भेट दिली.
पोलिसांनी तपास सुरू केला. बाणेर टेकडीवर यापूर्वी ईशान्यकडील राज्यातील तरुण आणि त्याच्या मित्राला लुटण्यात आले होते. याप्रकरणात पोलिसांनी चोरट्यांना अटकही केली होती. तांत्रिक तपासात आरोपी विशाल आणि साथीदारांनी लुटमारीचा गुन्हा केल्याची माहिती मिळाली. त्यानंतर पोलिसांच्या पथकाने त्यांना पकडले. पोलीस उपायुक्त हिंमत जाधव, सहायक आयुक्त अनुजा देशमाने यांच्या मार्गदर्शनाखाली वरिष्ठ पोलीस निरीक्षक महेश बोळकोटगी, गुन्हे शाखेचे निरीक्षक विजयानंद पाटील, उपनिरीक्षक प्रवीण चौगले, हवालदार श्रीकांत वाघवले, बाबुलाल तांदळे, सुधाकर माने, इरफान मोमीन, बाबा दांगडे, श्रीधर शिर्के यांनी ही कारवाई केली.
