पुणे : शहरात गोळीबारांचे सत्र कायम आहे. नऱ्हे भागातील भूमकर चौकात मध्यरात्री एका तरुणावर पिस्तुलातून गोळीबार करण्यात आल्याची घटना घडली. पुण्यात दोन दिवसांत गोळीबाराच्या तीन घटना घडल्या आहेत. एका बांधकाम व्यवसायिकावर दुचाकीवरून आलेल्या दोघांनी जंगली महाराज रस्त्यावर पिस्तूल रोखून गोळीबाराचा प्रयत्न केल्याची घटना मंगळवारी घडली होती. त्यानंतर हडपसरमधील शेवाळवाडी परिसरात बुधवारी व्यवसायिक स्पर्धेतून एका निवृत्त लष्करी जवानाने एकावर पिस्तुलातून गोळ्या झाडल्या.
सिंहगड पोलीस ठाण्याच्या हद्दीत भूमकर चौक परिसरात गुरुवारी पहाटे अडीच वाजताच्या सुमारास एका तरुणावर गोळ्या झाडण्यात आल्या. गणेश गायकवड (रा. वारजे) असे जखमी झालेल्याचे नाव आहे. काडीपेटी मागितल्याच्या कारणातून गोळीबार झाल्याची प्राथमिक माहिती मिळाली आहे.
मुंबईत अभिनेता सलमान खानच्या घराजवळ झालेल्या गोळीबाराच्या घटनेच्या पार्श्वभूमीवर पोलीस आयुक्तांनी शहरातील गुन्हेगारांची झडाझडती घेतली होती. त्यानंतर शहरात गोळीबाराच्या तीन घटना घडल्याने खळबळ उडाली आहे.
