पुणे : मांजामुळे दुचाकीस्वार ज्येष्ठ नागरिक जखमी झाल्याची घटना मंगळवारी सायंकाळी छत्रपती शिवाजी पुलावर घडली. ज्येष्ठ नागरिकावर रुग्णालयात प्रथमोपचार करुन त्यांना सोडण्यात आले देवराम दत्तात्रय कामठे (वय ६७, सध्या रा. शिवाजीनगर) असे जखमी झालेल्याचे नाव आहे. कामठे मूळचे पुरंदर तालुक्यातील आहेत.
दुचाकीस्वार कामठे मंगळवारी (१४ जानेवारी) सायंकाळी पाच वाजण्याच्या सुमारास शिवाजीनगर गावठाण परिसरातून शनिवारवाड्याकडे निघाले होते. त्यावेळी अचानक मांजा समोर आला. दुचाकीस्वार कामठे यांनी प्रसंगावधान राखून मांजा हाताने बाजूला करण्याचा प्रयत्न केला. मात्र, मांजाचा फास अंगठ्याला बसला. मांजाचा फास सोडविण्याचा प्रयत्नात असताना त्यांच्या गालाला दुखापत झाली. फास घट्ट बसल्याने त्यांच्या अंगठ्याला दुखापत झाली.
हेही वाचा…राज्यातील दुर्गम, आदिवासी भागातील जनतेला ‘टेलिमेडिसीन’ सेवेचा आधार!
संक्रातीच्या दिवशी पतंगबाजीसाठी नायलाॅन मांजाचा वापर करु नये, असे आवाहन पोलिसांनी केले. नायलाॅन मांजा विक्रीवर न्यायालयाने बंदी घातली आहे. न्यायालयाचा आदेश धुडकावून छुप्या पद्धतीने मांजा विक्री करणाऱ्यांविरुद्ध पोलिसांनी कारवाईचा बडगा उगारला. मांजा विक्री प्रकरणात पोलिसांनी गु्न्हे दाखल केले.
