पुणे : लाँन्ड्री व्यावसायिकाकडे दरमहा पाच हजार रुपये हप्त्याची मागणी करुन दुकानाची तोडफोड करणाऱ्या सराइताविरुद्ध वारजे पोलिसांनी गुन्हा दाखल केला. सराइताने परिसरात दहशत माजवून मोटारीची काच फोडली.
याप्रकरणी एका सराइताविरुद्ध गुन्हा दाखल करण्यात आला. याबाबत एका लाँन्ड्री व्यावसायिकाने वारजे पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदाराचे एनडीए रस्त्यावरील शिवणे भागात दांगट पाटीलनगर इस्त्री आाणि कपडे धुलाईचे दुकान आहे. आरोपी तीन दिवसांपूर्वी शिवणे भागात आला. त्याच्याकडे गज होता. ‘या भागाचा मी दादा आहे. या भागात व्यवसाय करायचा असेल, तर दरमहा पाच हजार रुपये हप्ता द्यावा लागेल’, अशी धमकी त्याने लाँन्ड्री व्यावसायिकाला दिली. पैसे न दिल्यास दुकान जाळून टाकण्याची धमकी त्याने दिली.
त्यानंतर त्याने व्यावसायिकाला लाथाबुक्क्यांनी मारहाण केली. या भागातील एका मोटारीची काच फोडली. शिवणे भागातील दांगट पाटीलनगर परिसरात लघुउद्योजकांचे कारखाने आहेत. या भागातील आणखी एका व्यावसायिकाला त्याने जीवे मारण्याची धमकी देऊन खंडणी मागितली. त्यांनी कारखाना पेटवून देण्याची धमकी दिली. मी पोलिसांना घाबरत नाही, अशी धमकी देऊन तो पसार झाला. घाबरलेल्या व्यावसायिकाने पोलिसांकडे तक्रार दिली. पसार झालेल्या आरोपीचा शोध घेण्यात येत आहे. वरिष्ठ पोलीस निरीक्षक विश्वजीत काईंगडे यांनी घटनास्थळी भेट दिली. पोलीस उपनिरीक्षक भरसट तपास करत आहेत.
हेही वाचा – पुणे : स्वयंपाकाच्या गॅस सिलिंडरचा काळाबाजार, सिंहगड रस्ता पोलिसांकडून ६१ सिलिंडर जप्त
तडीपार गुंडाकडून खंडणीची मागणी
तडीपार गुंडाने किराणा माल दुकानदाराला शस्त्राचा धाक दाखवून त्याच्याकडे खंडणीची मागणी केल्याची घटना हडपसर भागातील माळवाडी परिसरात घडली. याप्रकरणी तडीपार गुंडाविरुद्ध गुन्हा दाखल करण्यात आला आहे. याबाबत किराणा माल दुकानदाराने हडपसर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, सराइताला शहर आणि जिल्ह्यातून तडीपार करण्याचे आदेश देण्यात आले आहेत. दोन दिवसांपूर्वी तो रात्री माळवाडीतील किराणा माल दुकानात आला. त्याने दुकानदाराला खंडणीची मागणी केली. त्याला तीक्ष्ण शस्त्राचा धाक दाखविला. शस्त्र उगारुन त्याने दहशत माजविली. पोलीस उपनिरीक्षक मुलाणी तपास करत आहेत.
