पुणे : महाराष्ट्र राज्य रस्ते विकास महामंडळाच्या (एमएसआरडीसी) रिंगरोडच्या कामाला प्रत्यक्षात सुरूवात झाली असली तरी, रिंगरोडला निधीचा अडसर निर्माण झाला आहे. त्यामुळे भूसंपादनाच्या मोबदल्यापोटी वाटपासाठीचा सुमारे ३ हजार ६१४ कोटींचा थकीत निधी तातडीने वितरीत करावा, अशी मागणी जिल्हा प्रशासनाकडून रस्ते विकास महामंडळाकडे करण्यात आली आहे.
पुणे आणि पिंपरी-चिंचवड शहरातील वाहतुकीची कोंडी सोडविण्यासाठी रिंगरोड (वर्तुळाकार मार्ग) प्रस्तावित करण्यात आला आहे. हा रिंगरोड पूर्व आणि पश्चिम अशा दोन टप्प्यात विभागण्यात आला आहे. या रिंगरोडसाठीच्या मान्यतेची सर्व प्रक्रिया पूर्ण झाली असून निविदा काढून त्याचे कामही देण्यात आले आहे.
रिंगरोडसाठी जिल्ह्यातील आठ तालुक्यातील १ हजार ८८७ हेक्टर जागेचे संपादन करण्यात येणार आहे. त्यासाठी १० हजार ४६६ कोटींचा खर्च अपेक्षित आहे. राज्य शासनाकडून रिंगरोडच्या भूसंपादनाचा मोबदला वाटपाचा कालावधी नोव्हेंबर २०२४ मध्ये निश्चित करण्यात आला होता. त्यानंतर रिंगरोडसाठीचे उर्वरीत भूसंपादनाची प्रक्रिया येत्या १५ मार्च पर्यंत पूर्ण करण्याचे आदेश यासंदर्भातील आढावा बैठकीत देण्यात आले होते.
पूर्व विभागाच्या रिंगरोडसाठीचे भूसंपादन ८० टक्क्यांहून अधिक झाले आहे. तर पश्चिम भागासाठीचे भूसंपादन ९२ टक्के झाले आहे. या भूसंपादनासाठी महाराष्ट्र राज्य रस्ते विकास महामंडळाकडून ६ हजार ३९४ कोटींचा निधी उपलब्ध करून देण्यात आला आहे. मात्र उर्वरीत ३ हजार ६१४ कोटी रुपायंचा निधी अद्यापही महामंडळाकडून जिल्हा प्रशासनाला उपलब्ध करून देण्यात आलेला नाही. त्यामुळे जागांचे संपादन झाले असले तरी, शेतकऱ्यांच्या मोबदल्याचे वाटप थांबले असून त्याबाबत जागामालकांकडून जिल्हा प्रशासनाकडेही सातत्याने तक्रारी करण्यात येत आहेत. त्यामुळे उर्वरीत ३ हजार ६१४ कोटींचा निधी महाराष्ट्र राज्य रस्ते विकास महामंडळाने जिल्हा प्रशासनाला तातडीने द्यावा, असे पत्र जिल्हाधिकारी जितेंद्र डुडी यांनी महामंडळाला दिले आहे.
पूर्व भागातील रिंगरोडच्या भूसंपादनाची स्थिती
तालुका—–संपादन क्षेत्र—–आवश्यक निधी—–उपलब्ध निधी—–वाटप मोबदला—–शिल्लक निधी—–आवश्यक निधी
मावळ-२२८.३८—–१२८८.५५—–९७७.१५—–९२५.५४—–५१.६१—–३११.४०
खेड-२९४.६८—–१८१५.००—–१५०७.५४—–१४२३.९२—–८३.६१—–३०७.४६
हवेली-२९८.१९—-१८२१.४२—–१४५४.५२-१४०७.४९—–४७.०३—–३६६.९०
पुरंदर-२७५.०६-९८८.१६- ५०१.३२—–४५१.२९—–५०.०३—–४८६.८४
एकूण- १०९६.३१—–५९१३.१३—–४४४०.५३—–४२०८.२५—–२३२.२—–१४७२.६०
पश्चिम भागातील रिंगरोडच्या भूसंपादनाची स्थिती
तालुका—–संपादन क्षेत्र—–आवश्यक निधी—–उपलब्ध निधी—–वाटप मोबदला—–शिल्लक निधी—–आवश्यक निधी
मावळ-१४१.४३—–१८०५.५३——-१३०९.०१—–१२३६.४६—–७२.५५—–५९९.४०
हवेली-२२९.८१—–५८२.४०—–४२८.९५—–३८४.५८—–४४.३७—–१५३.४५
भोर-१४१.९२—–२६४.९४—–१२१.६७—–९४.१३—–२७.५३—–१४३.२७
एकूण- ७०.७६—–४५५३.२८—–२४११.५९—–२९८५.८——२२५.७२—–२९४१.६९