लोकसत्ता प्रतिनिधी
पुणे : मुंबईहून दोन तासांत अहमदाबाद येथे जाण्यासाठी बुलेट ट्रेन प्रस्तावित आहे. मात्र, केवळ ढोकळा खाण्यासाठी एक लाख कोटी घालवायचे कशाला? भूगोल म्हणजे जमीन. भूगोल काबीज करण्यासाठी लढाया होतात. आपला भूगोल अडचणीत आहे. येथील जमीन चलाखीने विकत घेतली जात आहे. न्हावा-शिवडी रस्त्यामुळे रायगडमधील मराठी माणसाला फटका बसणार आहे, अशी टिप्पणीही राज ठाकरे यांनी केली.
पिंपरी-चिंचवड येथील आद्य नाटककार विष्णूदास भावे नाट्यनगरीतील शंभराव्या अखिल भारतीय नाट्यसंमेलनामध्ये ‘नाटक आणि मी’ या विषयावर राज यांची मुलाखत झाली. त्यावेळी राजकीय सद्यस्थिती, मध्यमवर्गीय मराठी माणूस आदी मुद्द्यांवर त्यांनी सूचक भाष्य केले. दीपक करंजीकर यांनी त्यांची मुलाखत घेतली.
आणखी वाचा-“…तर मी शरद पवारांना वाकून नमस्कार करेन”; राज ठाकरे यांचं वक्तव्य चर्चेत
राज म्हणाले की, निवडणूक लढविण्याची लाज वाटते. स्वातंत्र्यानंतर १९५२ मध्ये पहिली निवडणूक झाली. गेल्या ७० वर्षात पाणी, रस्ते, आरोग्य, शिक्षण याच मुद्द्यांवर निवडणुका लढविल्या जात आहेत. याला प्रगती म्हणात येणार नाही. जातीपातीमध्ये लोकांना अडकविले जात आहे. हे लोण आता नाटक-चित्रपटातही येत आहे. जातीपातीमध्ये आपण एवढे गुंतलो आहोत की, आपली संस्कृती, परंपरा आणि आपल्या माध्यमांचा विसर पडला आहे.
चित्रपट हे माध्यम मला चांगले समजते. पण नाटकाबद्दल मला अधिक कुतूहल आहे. एका चौकानात हे कसे बसविले जाते, असा प्रश्न मला पडतो. नाटक हे त्या अर्थी सर्वांत अवघड माध्यम आहे, नाटकात रिटेक नसतो, असे सांगत कलावंतांबद्दलच्या माझ्या जाणिवा कायम जाग्या असतात. त्यामुळेच कलावंत कदाचित अडचणीत माझ्याकडे येत असतील. मला पाहूया, करूया, या गोष्टी आवडत नाहीत, असे राज ठाकरे यांनी सांगितले.
