पुण्यातील दौंड येथे राहणाऱ्या २४ वर्षीय तरुणीवर बलात्कार आणि तिचा गर्भपात केल्याप्रकरणी शिवसेना नेते रघुनाथ कुचिक यांच्या विरोधात शिवाजीनगर पोलिस स्टेशनमध्ये बलात्काराचा गुन्हा दाखल करण्यात आला आहे. रघुनाथ बबन कुचिक असे आरोपीचे पूर्ण नाव आहे.
पोलिसांनी दिलेल्या माहितीनुसार, आरोपी रघुनाथ कुचिक आणि पीडित तरुणी यांची ओळख ६ नोव्हेंबर २०२० पासून ते १० फेब्रुवारी २०२२ पर्यंत होती. त्या काळात सुरुवातीला ओळखीचे रूपांतर मैत्रीत आणि नंतर प्रेमात झाले. त्या तरुणीला आरोपी रघुनाथ कुचिक याने लग्नाचे आमिष दाखवून, शिवाजीनगर आणि अनेक ठिकाणी नेऊन लैंगिक अत्याचार केले.
त्या दरम्यान ती तरुणी गरोदर राहिली. याबाबत आरोपीला माहिती मिळताच, पीडित तरुणीचा गर्भपात केला आणि याबद्दल तू कोणाला काही सांगितले तर तुला मारून टाकेन अशी धमकी दिली. हा घडलेला प्रकार पीडित तरुणीने पोलिसांना सांगताच आरोपी रघुनाथ बबन कुचिक याच्या विरोधात गुन्हा दाखल केला असून अधिक तपास सुरू असल्याचे शिवाजीनगर पोलिसांनी सांगितले.
