पुणे : एका तरुणाला अन्नपदार्थ गिळण्यास त्रास होऊ लागला. त्यानंतर त्याला उलट्या होणे, मळमळणे आणि भूक न लागणे अशी लक्षणे जाणवू लागली. गेल्या सहा महिन्यांपासून हा त्रास सुरू असल्याने त्याची प्रकृती खालावली. अखेर तपासणीत त्याला अचलसिया कार्डिया हा दुर्मीळ विकार असल्याचे समोर आले. डॉक्टरांना आधुनिक उपचार पद्धतीने शस्त्रक्रिया करून या तरुणाची त्रासापासून सुटका केली.
हा रुग्ण ३४ वर्षांचा असून, त्याला सहा महिन्यांपासून अन्न गिळण्याचा त्रास होत होता. यामुळे त्यांची प्रकृती खालावली होती. त्याला बाणेरमधील मणिपाल हॉस्पिटलमध्ये दाखल करण्यात आले. त्यावेळी तपासणीत त्याला डिसफॅगिया झाल्याचे निष्पन्न झाले. त्याच्यावर एसोफॅगोगॅस्ट्रोड्युओडेनोस्कोपी (ओजीडी) ही करण्यात आली होती. त्यातून त्याला अचलसिया कार्डियाचा त्रास असल्याचे समोर आले. त्याची तपासणी केल्यानंतर डॉ. प्रसाद भाटे आणि त्यांच्या पथकाने पर ओरल एन्डोस्कोपिक मायोटोमी (पीओईएम) प्रक्रिया करण्याचा निर्णय घेतला.
हेही वाचा >>> आयुक्तांच्या आदेशाला केराची टोपली; कोणी दाखविली ही हिंमत !
पीओईएम प्रक्रियेची सुरुवात ही संपूर्णत: एन्डोस्कोपिक पद्धतीने केली जाते. यामध्ये अन्ननलिकेच्या स्नायूवर एक छेद देऊन उद्भवणारी समस्या काढून सर्वसाधारणपणे गिळण्याची प्रक्रिया तयार केली जाते. ही कमी जखम करणारी आणि वेगाने बरी होणारी प्रक्रिया आहे. शस्त्रक्रिया झाल्यानंतर दोन तासांत रुग्ण पाणी पिऊ लागला. काही दिवसांतच तो द्रवरुपातील अन्न आणि दहा दिवसांत मऊ भोजनही घेऊ लागला, अशी माहिती डॉ. प्रसाद भाटे यांनी दिली.
हेही वाचा >>> प्रतीक्षेतील स्वयंपुनर्विकासाच्या सोसायट्यांचा मार्ग मोकळा
अचलसिया कार्डिया म्हणजे काय?
अचलसिया कार्डिया हा दुर्मीळ असा लोअर एसोफेजियल स्फिंक्टर (एलईएस) आजार आहे. या आजारात अन्ननलिकेच्या रक्तवाहिन्या घट्ट झाल्यामुळे एलईएस प्रसरण पावत नाही. त्यामुळे सेवन केलेले अन्न आणि द्रवपदार्थ हे पोटात जात नाहीत. जगभरात दर एक लाख लोकसंख्येमागे ८ ते १२ जणांमध्ये अचल्सिया कार्डिया विकार आढळतो.
