“रुग्णवाहिका येतेय, मृतदेह अर्धा तास शवागृहात ठेवा, अश्विनी कोस्टाच्या पालकांची विनंती रुग्णालयाने धुडकावलेली”, काँग्रेसचा संताप

दरम्यान, रुग्णालय प्रशासनानेदेखील पोलिसांप्रमाणे ढिलाई दाखवल्याचा आरोप पुण्यातील कसबा पेठ विधानसभेचे आमदार रवींद्र धंगेकर यांनी केला आहे. धंगेकर यांनी एक्स या मायक्रोब्लॉगिंग प्लॅटफॉर्मवर एक पोस्ट केली आहे. या पोस्टमध्ये त्यांनी म्हटलं आहे की, “पुण्यातील कल्याणीनगर कार अपघात प्रकरणात ससून रुग्णालयाच्या दोन डॉक्टरांना अटक करण्यात आली आहे. आरोपीच्या रक्ताच्या अहवालात फेरफार केल्याचा त्यांच्यावर आरोप आहे. आपल्याला रक्त तपासणीचे अहवाल अवघ्या काही तासांत मिळतात. मात्र या प्रकरणात ७ दिवस होऊनही ते अहवाल मिळत नव्हते तेव्हाच हा प्रकार संशयास्पद वाटत होता.”

रवींद्र धंगेकर यांनी म्हटलं आहे की, “याच ससून रुग्णालयात मयत अश्विनी कोस्टा यांच्या नातेवाईकांनी मृतदेह अजून अर्धा तास शवागृहात ठेवा, आमची रुग्णवाहिका येत आहे, अशी विनंती केली होती. मात्र रुग्णालय प्रशासनाने अर्धा तास वाढवून द्यायला नकार दिला होता. असो, हे वाटतं तेवढं सोपं नाहीये. त्या रात्री अनेकांनी आपलं ईमान विकलं आहे, जे आता हळू हळू जगासमोर येतील.”

हे ही वाचा >> “ते लोक माझा खून…”, पुणे अपघातावरून रॅप करणाऱ्या आर्यनचा कारवाईनंतर आणखी एक व्हिडीओ व्हायरल

नेमकं प्रकरण काय?

अपघाताला जबाबदार असलेल्या अल्पवयीन मुलाने मद्यप्राशन केलं होतं का ते तपासण्यासाठी त्याच्या रक्ताचे नमुने तपासणीसाठी ससून रुग्णालयात पाठवण्यात आले होते. यावेळी अल्कोहोल न घेतलेल्या व्यक्तीचे नमुने अल्पवयीन मुलाच्या रक्ताचे नमुने म्हणून दाखवण्यात आले होती. परिणामी अहवालात त्याच्या शरीरात अल्कोहोल नसल्याचं सिद्ध झालं. त्यामुळे पोलिसांना संशय आला. त्याच्या रक्ताची पुन्हा तपासणी करण्यात आली. दुसऱ्यांदा झालेल्या चाचणीत त्याच्या शरीरात अल्कोहोल आढळलं. त्याचबरोबर, डीएनए चाचणीत दोन्ही चाचण्यातील रक्त नमुने वेगवेगळे असल्याचं सिद्ध झालं. त्यामुळे अल्पवयीन आरोपीचा वाचवण्यासाठी शासकीय रुग्णालयातील डॉक्टरांनी पुराव्यांमध्ये छेडछाड केली असल्याचा संशय तपासकर्त्यांना आला होता. याप्रकरणी पोलिसांनी अधिक तपास करून आज ससूनच्या फॉरेन्सिक विभागातील दोन डॉक्टरांना अटक केली आहे.