देशात नरेंद्र, राज्यात देवेंद्र, कसब्यात रवींद्र? काँग्रेसच्या घोषणेने भाजपाच्या गोटात खळबळ

या घोषणेला भाजपाकडूनही प्रत्युत्तर देण्यात आले आहे. देशात आणि राज्यात विकासाचे काम सुरू आहे, हे विरोधकांनी मान्य केले आहे. त्यामुळेच विरोधकांना भाजपा नेत्यांचा आधार घ्यावा लागत आहे. भाजपाच्या विकासाची भूमिका विरोधकांनी मान्य केली आहे, असे उत्तर भाजपाकडून घोषणेला देण्यात आले आहे.

हेही वाचा – “चिंचवड पोटनिवडणूक लढवण्यावर मी ठाम”, अपक्ष उमेदवार राहुल कलाटेंची भूमिका; महाविकास आघाडीला दिला ‘हा’ पर्याय

कसबा विधानसभा पोटनिवडणुकीची रणधुमाळी सुरू झाली आहे. भाजपचे उमेदवार हेमंत रासने आणि काँग्रेसचे उमेदवार रवींद्र धंगेकर यांच्याकडून अधिकृत प्रचाराला सुरुवात झाली आहे. येत्या काही दिवसांत निवडणुकीच्या प्रचारात दोन्ही पक्षांचे स्टार प्रचारक उतरणार असल्याने प्रचारातील रंगतही वाढणार आहे. यातच विरोधकांनी दिलेल्या नव्या घोषणेमुळे कसब्याची निवडणूक किती रंगतदार होणार, हे दाखवून दिले आहे.

रवींद्र धंगेकर यांच्या नावाची घोषणा झाल्यानंतर त्यांनी नाराज शैलेश टिळक यांची भेट घेतली. त्यानंतर उमेदवारी अर्ज भरण्यासाठीच्या यात्रेत केंद्रात नरेंद्र, राज्यात देवेंद्र आणि कसब्यात रवींद्र अशी घोषणाबाजी करण्यात आली. या दोन्ही घटना भाजपाच्या वर्मी लागल्या. त्यामुळेच भाजपाच्या निवडणूक तयारी बैठकीत त्यावर शहराध्यक्ष जगदीश मुळीक यांना भाष्य करावे लागले.

हेही वाचा – “चिंचवड पोटनिवडणुकीत यश आलेच पाहिजे”, अजित पवारांनी पदाधिकाऱ्यांना ठणकावले; म्हणाले, “महाविकास आघाडी..”

देशात आणि राज्यात विकासाचे काम सुरू आहे, हे विरोधकांनी मान्य केले आहे. त्यामुळेच विरोधकांना भाजपा नेत्यांचा आधार घ्यावा लागत आहे. भाजपाच्या विकासाची भूमिका विरोधकांनी मान्य केली आहे. त्यामुळे, भाजपा नेत्यांची नावे घेत घोषणाबाजी करण्यात आली, असा आरोप जगदीश मुळीक यांनी केला.