लोकसत्ता प्रतिनिधी
पुणे : आवक वाढल्याने फ्लॉवर, कोबी, ढोबळी मिरची, शेवग्याच्या दरात घट झाली. हिरवी मिरची, मटारच्या दरात वाढ झाली असून अन्य फळभाज्यांचे स्थिर असल्याची माहिती व्यापाऱ्यांनी दिली.
श्री छत्रपती शिवाजी मार्केट यार्डातील घाऊक बाजारात रविवारी राज्य, तसेच परराज्यातून मिळून १०० ट्रक फळभाज्यांची आवक झाली. कर्नाटक, गुजरात, आंध्र प्रदेशातून मिळून ७ ते ८ टेम्पो हिरवी मिरची, कर्नाटक, गुजरातमधून मिळून ४ ते ५ टेम्पो कोबी, कर्नाटक आणि गुजरातमधून मिळून प्रत्येकी २ ते ३ टेम्पो घेवडा, आंध्र प्रदेश, तमिळनाडूतून मिळून ५ ते ६ टेम्पो शेवगा, राजस्थानातून ५ ते ६ टेम्पो गाजर, राजस्थानातून १ ट्रक मटार, कर्नाटकातून ३ ते ४ टेम्पो पावटा, ३ टेम्पो भुईमूग शेंग, तामिळनाडू, कर्नाटकातून ३ ते ४ टेम्पो तोतापुरी कैरी, गुजरात आणि मध्य प्रदेशातून १० ते १२ टेम्पो लसूण अशी आवक परराज्यातून झाली, अशी माहिती मार्केट यार्डातील ज्येष्ठ अडते विलास भुजबळ यांनी दिली.
पुणे विभागातून सातारी आले ५०० ते ६०० गोणी, भेंडी ८ ते १० टेम्पो, गवार ५ ते ६ टेम्पो, टोमॅटो ८ ते १० हजार पेटी, हिरवी मिरची ३ ते ४ टेम्पो, ढोबळी मिरची १० ते १२ टेम्पो, काकडी १० ते १२ टेम्पो, कोबी ८ ते १० टेम्पो, फ्लाॅवर १० ते १२ टेम्पो, तांबडा भोपळा १० ते १२ टेम्पो, कांदा ९० ते १०० ट्रक, तसेच इंदूर, आग्रा, स्थानिक भागातून ४० टेम्पो बटाट्याची आवक झाली.
कोथिंबिर, मेथी, शेपू, कांदापात, राजगिऱ्याच्या दरात घट
कोथिंबिर, मेथी, शेपू, राजगिरा या पालेभाज्यांच्या दरात घट झाली. चाकवत, पुदिना, अंबाडी, मुळे, चुका, चवळई, पालक या पालेभाज्यांचे दर स्थिर आहेत. तरकारी विभागात कोथिंबीर एक लाख जुडी, मेथीच्या ६० हजार जुडींची आवक झाली., अशी माहिती तरकारी विभागातील व्यापाऱ्यांनी दिली. घाऊक बाजारात पालेभाज्यांचे शेकड्याचे दर पुढीलप्रमाणे – कोथिंबीर- ८०० ते १०००, मेथी – ६०० ते ८००, शेपू – ५०० ते ८००, कांदापात- ८०० ते १०००, चाकवत – ३०० ते ६००, करडई- ३०० ते ५००, पुदिना – ३०० ते ५००, अंबाडी – ३०० ते ६००, मुळे – ८०० ते १२००, राजगिरा- ४०० ते ६००, चुका – ५०० ते ८००, चवळई- ३००-६००, पालक- ८००- १२००
डाळिंब, स्ट्राॅबेरी, पपईच्या दरात घट
डाळिंब, स्ट्राॅबेरी, पपईच्या दरात घट झाली. खरबूज, पेरूच्या दरात घट झाली आहे. अननस, कलिंगड, मोसंबी, कलिंगड, चिकूचे दर स्थिर असल्याची माहिती व्यापाऱ्यांनी दिली. फळबाजारात रविवारी मोसंबी २५ ते ३० टन, संत्री ६० ते ६५ टन, डाळिंब ३० ते ३५ टन, पपई १० ते १२ टेम्पो, लिंबे १५०० ते १६०० गोणी, कलिंगड ६० ते ७० टेम्पो, खरबूज १५ ते २० टेम्पो, चिकू दोन हजार खोकी, पेरू ३०० ते ४०० प्लास्टिक जाळी (क्रेट), अननस ६ ट्रक अशी आवक झाली.
