आवक वाढल्याने लसूण, फ्लाॅवर, कोबी, शेवग्याच्या दरात घट

श्री छत्रपती शिवाजी मार्केट यार्डातील घाऊक बाजारात रविवारी राज्य, तसेच परराज्यातून मिळून ९० ट्रक फळभाज्यांची आवक झाली. कर्नाटक, गुजरात, आंध्र प्रदेशातून मिळून ७ ते ८ टेम्पो हिरवी मिरची, कर्नाटक, गुजरातमधून मिळून ३ ते ४ टेम्पो कोबी, कर्नाटक आणि गुजरातमधून मिळून प्रत्येकी ३ ते ४ टेम्पो घेवडा, आंध्र प्रदेश, तमिळनाडूतून मिळून ५ ते ६ टेम्पो शेवगा, राजस्थानातून ७ ते ८ टेम्पो गाजर, तसेच ८ ते १० ट्रक मटार, गुजरात, मध्य प्रदेशातून १० ते १२ टेम्पो लसूण अशी आवक परराज्यातून झाली, अशी माहिती मार्केट यार्डातील ज्येष्ठ अडते विलास भुजबळ यांनी दिली.

पुणे विभागातून सातारी आले ५०० ते ६०० गोणी, भेंडी ८ ते १० टेम्पो, गवार ४ ते ५ टेम्पो, टोमॅटो ८ ते १० हजार पेटी, हिरवी मिरची ३ ते ४ टेम्पो, ढोबळी मिरची १० ते १२ टेम्पो, काकडी ७ ते ८ टेम्पो, कोबी ८ ते १० टेम्पो, फ्लाॅवर १० ते १२ टेम्पो, तांबडा भोपळा १० ते १२ टेम्पो, कांदा ८० ते ९० ट्रक, तसेच इंदूर, आग्रा, स्थानिक भागातून ४० टेम्पो बटाट्याची आवक झाली.

मेथी, कोथिंबिर, कांदापात, मुळे, पालकच्या दरात वाढ

मेथी, कोथिंबिर, कांदापात, मुळे ,पालक या पालेभाज्यांच्या दरात वाढ झाली. अन्य पालेभाज्यांचे दर स्थिर आहेत. तरकारी विभागात कोथिंबीर ९० हजार जुडी, मेथीच्या ५० हजार जुडींची आवक झाली., अशी माहिती तरकारी विभागातील व्यापाऱ्यांनी दिली. घाऊक बाजारात पालेभाज्यांचे शेकड्याचे दर पुढीलप्रमाणे – कोथिंबीर- ८०० ते १५००, मेथी – ८०० ते १२००, शेपू – ६०० ते ८००, कांदापात- ६०० ते १०००, चाकवत – ३०० ते ६००, करडई- ३०० ते ६००, पुदिना – ३०० ते ६००, अंबाडी – ४०० ते ६००, मुळे – ८०० ते १२००, राजगिरा- ४०० ते ६००, चुका – ५०० ते ८००, चवळई- ३००-६००, पालक- ८००- १२००

कलिंगड, खरबूज, पपई, लिंबू महाग

उन्हाळ्यामुळे कलिंगड, खरबूज, पपई, लिंबांच्या मागणीत वाढ झाली. मागणी वाढल्याने कलिंगड, खरबूज, पपईच्या दरात किलोमागे दोन ते पाच रुपयांनी वाढ झाली. लिंबांच्या मागणीत वाढ झाल्याने १५ ते २० किलोच्या गोणीमागे २०० रुपयांनी वाढ झाली आहे. अननस, संत्री, मोसंबी, डाळिंब, चिकूचे दर स्थिर असल्याची माहिती व्यापाऱ्यांनी दिली. फळबाजारात रविवारी मोसंबी ४० ते ५० टन, संत्री ५० ते ६० टन, डाळिंब १५ ते २० टन, पपई ८ ते १० टेम्पो, लिंबे १२०० ते १३०० गोणी, कलिंगड ५० ते ६० टेम्पो, खरबूज ३० ते ४० टन, चिकू दोन हजार खोकी, पेरू १० टन, अननस ५ते ६ ट्रक अशी आवक झाली.