पुणे : ससून रुग्णालयाच्या नव्या इमारतीतील लिफ्टमध्ये शुक्रवारी दुपारी सहाजण अडकले. अग्निशामक दलाच्या जवानांनी त्यांची सुखरूप सुटका केली.
ससून रुग्णालयाच्या नवीन इमारतीतील लिफ्टमधून दुपारी बाराच्या सुमारास रुग्णांचे नातेवाईक आणि रुग्णालयातील कर्मचारी तळमजल्यावर निघाले होते. लिफ्ट चौथ्या आणि पाचव्या मजल्यांच्या मधोमध अडकली. लिफ्टमधील नागरिकांनी मदतीसाठी आरडाओरडा केला. रुग्णालयातील सुरक्षा रक्षकांनी लिफ्ट तळमजल्यावर आणण्यासाठी प्रयत्न सुरू केले. रुग्णालयातील कर्मचाऱ्यांनी अग्निशमन दालाला याबाबतची माहिती दिली.
हेही वाचा – पुणे : ‘स्वच्छ’ला पुन्हा तात्पुरती मुदतवाढ; शहरातील कचरा प्रश्न पुन्हा ऐरणीवर
हेही वाचा – केळीच्या विम्यासाठी दहा हजार बोगस अर्ज; जळगावमधील प्रकार
अग्निशमन दलाच्या जवानांनी घटनेचे गांभीर्य ओळखले. लिफ्टमध्ये अडकलेले सहाजण घाबरले होते. जवानांनी लिफ्टचा दरवाजा वाकवला. लिफ्ट कंपनीच्या कर्मचाऱ्यांशी संपर्क साधून लिफ्ट सुरू केली. लिफ्टमध्ये अडकलेल्या दोन महिलांसह सहाजणांची सुटका केली. अग्निशमन दलाचे अधिकारी संजय रामटेके, प्रशांत गायकर, सचिन चव्हाण, ओंकार साखरे, सुनिल नामे, केतन नरके, परेश जाधव, अक्षय शिंदे आदी मदतकार्यात सहभागी झाले होते.
