पुणे : खडकवासला धरणसाखळी प्रकल्पातील खडकवासला वगळता इतर तिन्ही धरणांच्या परिसरात बुधवारी दिवसभरात पावसाने विश्रांती घेतली. सध्या चारही धरणांमधील पाणीसाठा ७३ टक्क्यांवर पोहोचला आहे. पुढील काही दिवस धरणांच्या परिसरात तुरळक पाऊस पडण्याची शक्यता हवामान विभागाकडून व्यक्त करण्यात आली आहे.
शहराला पाणीपुरवठा करणाऱ्या टेमघर, वरसगाव, पानशेत आणि खडकवासला या चारही धरणांमधील २१.३७ अब्ज घनफूट (टीएमसी) म्हणजेच ७३.३२ टक्के एवढा झाला आहे. दिवसभरात टेमघर, वरसगाव आणि पानशेत धरणांच्या परिसरात पावसाने विश्रांती घेतली, तर खडकवासला धरण परिसरात ३० मिलिमीटर पाऊस पडला. शहराच्या विविध भागात बुधवारी सायंकाळी दीर्घ विश्रांतीनंतर पावसाने हजेरी लावली. त्यामुळे शहराजवळ असलेल्या खडकवासला धरणाच्या परिसरातही चांगला पाऊस झाला. सध्या टेमघर धरण ६१ टक्के, वरसगाव आणि पानशेत ही धरणे अनुक्रमे ७१ टक्के आणि ७७ टक्के, तर खडकवासला हे धरण यापूर्वीच पूर्ण क्षमतेने भरलेले आहे.
दरम्यान, पिंपरी-चिंचवड शहराला पाणीपुरवठा करणाऱ्या पवना धरणक्षेत्रात दिवसभरात चार मि.मी. पावसाने हजेरी लावली. सध्या या धरणात ८० टक्के पाणीसाठा जमा झाला आहे. जिल्ह्यातील इतर धरणांच्या परिसरातही पावसाने उघडीप दिली. सध्या येडगाव, घोड, चासकमान आणि वीर ही धरणे पूर्ण क्षमतेने भरलेली असल्यामुळे या धरणांमधून काही प्रमाणात पाण्याचा विसर्ग करण्यात येत असल्याचेही जलसंपदा विभागाकडून सांगण्यात आले.
प्रमुख धरणांमधील पाणीसाठा टीएमसी, कंसात टक्क्यांत
टेमघर २.२५ (६०.६४), वरसगाव ९.१७ (७१.४९), पानशेत ८.२५ (७७.५३), खडकवासला १.७० (८६.२४), भामा आसखेड
७.०८ (९२.३७), पवना ६.८५ (८०.५१), गुंजवणी ३.१२ (८४.४८), निरा देवघर ७.६६ (६५.३३), भाटघर १७.०४ (७२.४९), वीर ९.२४ (९८.२१) आणि उजनी ३८.०५ (७१.०२)
