पुणे जिल्ह्यातील २५ तलावांचे पुनरुज्जीवन – स्वातंत्र्यदिनी ध्वजारोहण

केंद्र शासनाच्या अमृत सरोवर योजनेच्या माध्यमातून पावसाचे पाणी भूगर्भात मुरवले जात आहे. त्यातून भूगर्भातील पाणीपातळी वाढवण्याचे प्रयत्न केले जात आहेत. १५ ऑगस्टपर्यंत ही कामे पूर्ण करण्यात येणार आहेत. पावसाळ्यात नवीन तलावांची निर्मिती करणे शक्य नाही. त्यामुळे सध्या पुनरुज्जीवनाचा कार्यक्रम हाती घेण्यात आला आहे, तर पुढील वर्षासाठी नवीन ७५ तलावांची नावे निश्चित करण्यात आली आहेत, असे जिल्हा प्रशासनाकडून सांगण्यात आले.

जिल्ह्यातील काही गावांत अमृत सरोवरांची निर्मिती करता येत नसेल, त्या ठिकाणी उपलब्ध तलावातील गाळ काढणे, तलावाचे पुनरुज्जीवन करणे आदी कामे करून तलावातील पाणीसाठा वाढवण्याचे प्रयत्न केले जात आहेत. या कामासाठी महात्मा गांधी राष्ट्रीय ग्रामीण रोजगार हमी योजना, १५ वा वित्त आयोग, कृषी सिंचन योजना यासह इतर योजनांचा निधी वापरला जात आहे. ‘आजादी का अमृत महोत्सव’ अंतर्गत अमृत सरोवर योजना राबविली जात आहे. जिल्ह्यात ७५ तलावांची निवड करण्यात येणार होती. मात्र, पुणे जिल्ह्यात ९० तलावांची निवड करण्यात आली आहे. त्यातील ४८ ठिकाणी कामाला सुरुवात झाली आहे, तर त्यातील २५ तलावांचे काम १५ ऑगस्टपर्यंत पूर्ण होणार आहे, असेही जिल्हा प्रशासनाकडून सांगण्यात आले.
जिल्ह्यातील १९ तलावांचे काम पूर्ण झाले असून २५ तलावांचे काम १५ ऑगस्टपर्यंत होणार आहे. या सर्व २५ तलावांवर गावातील ज्येष्ठ नागरिकांच्या हस्ते ध्वजारोहण केले जाणार आहे, असे रोहयोच्या उपजिल्हाधिकारी डॉ. वनश्री लाभशेटवार यांनी सांगितले.