पुणे : रिक्षाचालकाला दमदाटी करुन सराइत गुन्हेगारांनी रिक्षा चोरुन नेल्याची घटना भवानी पेठेत घडली. या प्रकरणी दोन सराईत गुन्हेगारांच्या विरुद्ध गुन्हा दाखल करण्यात आला आहे. फिरोज उर्फ बब्बाली मकबूल खान (वय ४९, रा. भवानी पेठ), इमरान मेमन (वय ५०) अशी गुन्हा दाखल झालेल्यांची नावे आहेत. याबाबत राजू डेव्हिड (वय ६०, रा. भवानी पेठ) यांनी समर्थ पोलीस ठाण्यात फिर्याद दिली आहे. खान आणि मेमन सराई त गुन्हेगार आहे. कारागृहात असलेला खान जामीन मिळवून नुकताच बाहेर आला आहे.
आरोपी आणि रिक्षाचालक डेव्हिड ओळखीचे आहेत. भवान पेठेतील निशात चित्रपटगृहाजवळ रिक्षाचालक डेव्हिड थांबले होते. त्या वेळी आरोपी खान आणि मेमन तेथे आले. डेव्हिड यांना दमदाटी करुन आरोपी रिक्षा घेऊन पसार झाले. डेव्हिड यांनी पोलीस ठाण्यात धाव घेऊन तक्रार नोंदविली. सहायक पोलीस निरीक्षक प्रसाद लोणारे तपास करत आहेत.
