पिंपरी : पिंपरी-चिंचवड शहरात शनिवारी जोरदार पाऊस झाला. दुपारी तीनच्या सुमारास सुरू झालेला मुसळधार पाऊस सायंकाळी साडेसहा वाजेपर्यंत पडत होता. त्यामुळे विविध भागांतील रस्ते जलमय झाले होते. अनेक ठिकाणी पाणी साचल्याच्या घटना घडल्या. शहरात शुक्रवारी सायंकाळी पावसाचा जोर वाढला होता. परंतु, तासाभरात पाऊस उघडला. शनिवारी सकाळपासून ढगाळ वातावरण होते. दुपारी तीनच्या सुमारास मुसळधार पाऊस सुरू झाला.
हेही वाचा >>> राज्यात बुधवारपर्यंत मुसळधार पाऊस, हवामान विभागाचा अंदाज
पिंपरी, चिंचवड, भोसरी, आकुर्डी, निगडी, वाकड, सांगवी, पिंपळे निलख असा शहराच्या सर्वच भागांत जोरदार पाऊस झाला. सायंकाळी साडेसहापर्यंत पावसाचा जोर कायम होता. त्यानंतर पावसाचा जोर कमी झाला, तरी रिमझिम सुरूच होती. मुसळधार पावसामुळे चोहीकडे पाणीच पाणी झाले. रस्ते जलमय झाले. आकुर्डीसह काही ठिकाणी पाणी साचल्याच्या घटना घडल्या. रस्त्यांवर पडलेल्या खड्ड्यांत पाणी साचल्याने रस्ते जलमय झाले होते. समतल विलगकामध्ये मोरवाडी, कासारवाडी, कुंदननगर भागात पाणी साचल्याने त्याचा फटका वाहतुकीला बसला. वाहतूक संथ झाली होती. पिंपरी ते चिंचवड रस्त्यावर मोठी वाहतूककोंडी झाली होती. वाहनांच्या लांबच रांगा लागल्या होत्या. महापालिका यंत्रणा सतर्क असल्याचे आपत्ती व्यवस्थापन अधिकारी ओमप्रकाश बहिवाल यांनी सांगितले.
