पिंपरी- चिंचवड: राष्ट्रवादी शरद पवार गटाचे युवा नेते रोहित पवारांवर मावळ राष्ट्रवादीचे आमदार, अजित पवारांचे कट्टर समर्थक सुनील शेळके यांनी जोरदार टीका केली आहे. रोहित पवारांना मुख्यमंत्री व्हायचं असल्याने ते अजित पवारांना लक्ष करत आहेत. रोहित पवारांनी लक्षात ठेवावं अजित पवारांमुळेच त्यांना कर्जत – जामखेडची उमेदवारी मिळाली आहे. त्या मतदारसंघाचा विकास झाला आहे. असा घणाघात सुनील शेळके यांनी रोहित पवारांवर केला आहे. ते पिंपरी- चिंचवडमध्ये पत्रकारांशी बोलत होते.
हेही वाचा : पिंपरी: मुख्यमंत्री आले अन् काहीही न बोलता निघून गेले…
आमदार सुनील शेळके म्हणाले, रोहित पवारांना स्वतःच कर्तृत्व सिद्ध करायचं आहे. पण, अजित पवारांनी महाराष्ट्रासाठी गेली २५ वर्ष झालं रक्ताचं पाणी केलं आहे. त्या अजित पवारांवर बोलून रोहित पवारांना मोठं व्हायचं आहे. मुळात अजित पवार यांनीच रोहित पवारांना राजकारणात आणलं आहे. कर्जत- जामखेडला उमेदवारी मिळवून त्यांना आमदार केलं. मतदारसंघाचा विकास केला. शेळके, लंके यांच्या पेक्षा अधिक प्रेम दिलं. पण, रोहित पवारांना अजित पवारांची जागा घ्यायची आहे. त्यांना महाराष्ट्राचा मुख्यमंत्री व्हायचं स्वप्न पडत आहे. म्हणून अजित पवारांवर ते टीका करतात. पुढे ते म्हणाले, २०१९ ला ज्या घडामोडी घडल्या. त्या घडत असताना सर्व नेते एकत्र होते. कुठली भूमिका बदलायची?, कुणाला कुठली खाती द्यायची?, महायुतीत गेल्यास आपल्याला काय मिळेल?, या सर्व घडामोडी प्रत्येकाला माहीत आहेत. तरीही केवळ अजित पवारांना व्हिलन केलं जातं आहे. यावर अजित पवारांनी प्रत्यक्षात बोलावं. अजित पवारांना विरोधक व्हिलन, मलिदा गँग म्हणून बोलत आहेत. अजित पवारांनी सांगावं अशी वेळ आली आहे. त्यांनी त्यांची भूमिका मांडल्यास रोहित पवार आणि जितेंद्र आव्हाड यांना रस्त्यावर जनता फिरू देणार नाही. असा हल्लाबोल आमदार सुनील शेळके यांनी केला आहे.
