लोकसत्ता प्रतिनिधी
पुणे : बारामती लोकसभा मतदार संघातील भोर मतदारसंघात शांततेत मतदान झाले. दुपारी तीनपर्यंत भोर-वेल्ह्यात ३८ टक्के मतदान झाले. दुपारनंतर मतदान केंद्रांवर गर्दी झाली. मुळशीतील पौडसह विविध गावात दुपारनंतर मतदानाचा वेग वाढला.
भोरचे माजी आमदार संग्राम थोपटे यांनी सकाळी मतदानाचा हक्क बजाविला. भोर, वेल्हा, मुळशी भागात मतदानाच्या पहिल्या टप्यात फारसा उत्साह नव्हता. ऊन्हाची तीव्रता कमी झाल्यानंतर मतदारांची मतदान केंद्रात गर्दी होऊ लागल्याचे पाहायला मिळाले. भोर शहरातील मतदान केंद्रावर नागरिकांची गर्दी झाली होती. भोरमधील मतदान केंद्रांवर बंदोबस्त तैनात करण्यात आला होता.
आणखी वाचा-बारामती मतदारसंघात तीन वाजेपर्यंत किती टक्के झाले मतदान?
वेल्ह्यातील विंझर, गुंजवणी खोऱ्यात, राजगड पायथा, वाझेघर पाली, दापुडी, अंतरवली, मार्गासनी, आंबावणे, करंजावणे गावातील मतदान केंद्रावर गर्दी झाली होती. वेल्ह्यातील मतदान केंद्रावर गर्दी झाली होती. खेड-शिवापूर, नरसरापूर, राजगड पायथा, शिवगंगा खोऱ्यातील मतदान केंद्रावर दुपारनंतर गर्दी झाली होती. किरकोळ वादावादीचे प्रकार वगळता मतदान शांततेत पार पडले. दुपारी तीनपर्यंत भोर मतदार संघात ३८ टक्के मतदान झाले होते.
मुळशीतील पौड, मारणेवाडी, मुठा, आंदगाव, भुकूम, बेलावडे, खेचरे, चिंचवड-आंदेश, कोंढवळे, माले, शेरे, कोंढूर, संभवे या गावातील मतदान केंद्रांवर मतदारांनी मतदानाचा हक्क बजावला. मुळशीतील मतदान केंद्रावर मोठा पोलीस बंदोबस्त ठेवण्यात आला होता. मुळशी तालुक्यात मतदान शांततेत पार पडले.
