‘श्रद्धेने केलेला रियाज व उपासनेतूनच गाणे टिकते’

गाणं ही सोपी गोष्ट नाही, गाणे टिकविण्यासाठी श्रद्धेने केलेला रियाज व उपासनेची गरज असते. याच श्रद्धेने मी गाणे करतो, असे मनोगत युवा गायक राहुल देशपांडे यांनी व्यक्त केले.
साईनाथ मंडळ ट्रस्टच्या वतीने देण्यात येणारा ‘साई पुरस्कार’ शुक्रवारी प्रसिद्ध व्हायोलीन वादक प्रभाकर जोग यांच्या हस्ते राहुल देशपांडे यांना देण्यात आला. त्या वेळी ते बोलत होते. नगरसेवक हेमंत रासणे, मंडळाचे अध्यक्ष अमर हिरेशिखर व पियुष शहा आदी त्या वेळी उपस्थित होते.
देशपांडे म्हणाले, पं. वसंतराव देशपांडे यांच्या घरात जन्म झाला, हे माझे भाग्य आहे. त्यामुळे रक्तातूनच गाणं आले व पुढे गुरुजनांकडून त्यावर संस्कार झाले. सध्या विविध वाहिन्यांवरील गाण्यांच्या स्पर्धेच्या युगामध्ये काही चांगले व वाईट परिणामही झाले आहेत. लोकांना गाणं खूप सोपे वाटू लागले आहे. त्यामुळे त्या गाण्यात आनंद राहत नाही. गाण्यासाठी  श्रद्धेने केलेला रियाज व उपासनेची गरज असते.
जोग म्हणाले, देशपांडे यांनी गाण्याच्या माध्यमातून तरुण वयात चांगले काम केले आहे. साई मंडळ ट्रस्टनेही विविध सामाजिक उपक्रमांतून चांगला संदेश दिला आहे.
साई मंडळ ट्रस्टच्या पुढाकाराने काही मंडळांच्या बरोबरीने पुरंदर तालुक्यातील दोन गावांमध्ये पाण्याची पातळी वाढविण्यासाठी काम करण्यात येणार असल्याचे पियुष शहा यांनी या वेळी सांगितले.