पुणे : मावळ लोकसभा मतदारसंघात राज्याचे उपमुख्यमंत्री अजित पवार हे महायुतीचे उमेदवार श्रीरंग बारणेंसाठी प्रचार करत आहेत. यावरूनच शिवसेना उद्धव ठाकरे गटाचे नेते संजय राऊत यांनी अजित पवारांना टोला लगावला आहे. पार्थ पवारांचे वडील अजित पवार हे मावळमध्ये उतरले असले, तरी श्रीरंग बारणे यांचा पराभव अटळ आहे. असा टोला त्यांनी अजित पवारांना लगावला आहे. बारामतीत नवरा म्हणून उतरणारे अजित पवार यांच्या पत्नीचा म्हणजे सुनेत्रा पवार यांचा पराभव होईल. असा विश्वास संजय राऊत यांनी व्यक्त केला आहे.
संजय राऊत यांच्या हस्ते पिंपरीत महाविकास आघाडीचे उमेदवार संजोग वाघेरे यांच्या मध्यवर्ती कार्यालयाचे उद्घाटन करण्यात आलं. संजय राऊत पत्रकार परिषदेत बोलत होते. यावेळी महाविकास आघाडीचे उमेदवार संजोग वाघेरे, शहराध्यक्ष तुषार कामठे यांच्यासह इतर पदाधिकारी उपस्थित होते.
हेही वाचा…आरटीई अंतर्गत किती अर्ज दाखल? अर्ज भरण्यासाठी राहिले दोनच दिवस!
२०१९ मध्ये झालेल्या लोकसभेत अजित पवार यांचे सुपुत्र पार्थ पवारांचा श्रीरंग बारणे यांनी पराभव केला होता. आता त्याच अजित पवारांना श्रीरंग बारणे यांचा प्रचार करावा लागत आहे. या प्रश्नाचे उत्तर देताना संजय राऊत म्हणाले, आता तेच अजित पवार हे श्रीरंग बारणेचा पराभव करतील. २०१९ मध्ये पार्थ पवारसाठी वडील अजित पवार निवडणुकीच्या रिंगणात उतरले होते. आता बारामतीत नवरा म्हणून अजित पवारांना निवडणुकीत उतरावं लागत आहे. तरीही मावळमध्ये श्रीरंग बारणे यांचा आणि बारामतीत सुनेत्रा पवार यांचा पराभव होणार असा विश्वास संजय राऊत यांनी व्यक्त केला आहे.
