शिवशाहिरांकडून आठवणींना उजाळा; सरोजिनी बाबर यांच्या जन्मशताब्दीस प्रारंभ
महाराष्ट्राच्या ग्रामीण भागातील ओव्या, गीते, कथा, म्हणी, उखाणे असा लोकवाङ्मयाचा अफाट संग्रह असलेल्या सरोजिनीअक्का म्हणजे सरस्वतीची लाडकी लेकच, अशा शब्दांत शिवशाहीर बाबासाहेब पुरंदरे यांनी ज्येष्ठ साहित्यिका आणि लोकसाहित्याच्या अभ्यासक डॉ. सरोजिनी बाबर यांच्या आठवणींना उजाळा दिला. मी अक्कांचा लाडका सख्खा भाऊ होतो आणि आजही त्या घराशी माझे भावंडाचे नाते आहे, असेही त्यांनी सांगितले.
लोकसाहित्य, लोककला आणि एकूणच लोकजीवनाच्या ज्येष्ठ अभ्यासक डॉ. सरोजिनी बाबर यांच्या जन्मशताब्दी वर्षांस सोमवारपासून (७ जानेवारी) प्रारंभ होत आहे. हे औचित्य साधून बाबर यांच्याशी असलेले बंधुत्वाचे नाते पुरंदरे यांनी उलगडले. लोकसाहित्य आणि लोकसंस्कृती या विषयावरच बाबर यांनी विपुल लेखन केले. राज्य शासनाच्या लोकसाहित्य समितीचे अध्यक्षपद भूषविलेल्या बाबर यांनी दूरदर्शनसाठी ज्येष्ठ कवयित्री शांता शेळके यांच्यासमवेत ‘रानजाई’ या लोकगीतांवरील कार्यक्रमात सहभाग घेतला होता. त्या दोन वेळा राज्यसभा खासदार होत्या.
लेखन, गायन, वक्तृत्व आणि नेतृत्व अक्काताईंच्या देहात जन्मत:च पेरले गेले आणि तेच पुढे डौलदार वृक्षासारखे वाढतही गेले, असे सांगून पुरंदरे म्हणाले,की सरोजिनीअक्का यांचे वडील कृ. भा. बाबर हे अभ्यासू शिक्षक होते. चाणाक्ष आणि विधायक दृष्टीने पाहणारे बाबर सर हे मला वडिलांइतकेच प्रिय आणि तेवढेच स्पष्टवक्ते मार्गदर्शक होते.
