सेट परीक्षेची तारीख जाहीर; अर्जप्रक्रिया कधीपासून?

पुणे : सहायक प्राध्यापक पदासाठीची राज्यस्तरीय पात्रता परीक्षा (सेट) येत्या १५ जून रोजी आयोजित करण्यात येणार आहे. या परीक्षेसाठी २४ फेब्रुवारीपासून अर्ज करता येणार आहे. सावित्रीबाई फुले पुणे विद्यापीठाच्या सेट विभागाने ही माहिती दिली. सावित्रीबाई फुले पुणे विद्यापीठाच्या सेट विभागातर्फे महाराष्ट्र आणि गोवा या राज्यांसाठी सेट परीक्षा घेतली जाते. त्यानुसार ४०वी सेट परीक्षा महाराष्ट्र आणि गोव्यातील विविध केंद्रांवर घेतली जाणार आहे. उमेदवारांना २४ फेब्रुवारी ते १३ मार्च या दरम्यान सावित्रीबाई फुले पुणे विद्यापीठाच्या संकेतस्थळाद्वारे अर्ज भरता येणार आहे. तसेच, विलंब शुल्कासह अर्ज भरण्यासाठी १४ ते २१ मार्च अशी मुदत देण्यात आल्याचे विद्यापीठाच्या सेट विभागाने नमूद केले आहे.