पुण्यातील चंदननगर पोलीस ठाण्याच्या हद्दीत एक धक्कादायक घटना उघडकीस आहे. येथील एका शाळकरी मुलीला धमकी देऊन तिच्यावर बलात्कार करण्यात आला आहे. पीडित मुलगी गर्भवती राहिल्यानंतर हा प्रकार उघडकीस आला आहे. या प्रकरणी पीडित मुलीच्या आईनं चंदननगर पोलीस ठाण्यात फिर्याद दाखल केली आहे. पोलिसांनी विविध कलमाअंतर्गत गुन्हा दाखल करत आरोपीला अटक केली आहे. या घटनेचा पुढील तपास केला जात आहे.
विशाल पिराजी शिकरे असं अटक करण्यात आलेल्या २० वर्षीय तरुणाचं नाव आहे. तो खराडी परिसरातील रहिवासी आहे. मिळालेल्या माहितीनुसार, आरोपी विशाल हा पीडित मुलीच्या कुटुंबीयांचा ओळखीचा आहे. तो त्यांच्याकडे अनेकदा यायचा. दरम्यान आरोपी विशालने पीडित मुलीला प्रेमाच्या जाळ्यात ओढून तिच्यावर वेळोवेळी बलात्कार केला.
तसेच या प्रकाराची कोणाला माहिती दिल्यास गंभीर परिणाम भोगावे लागतील, अशी धमकीही आरोपीनं पीडित मुलीला दिली. पीडित मुलीची वैद्यकीय तपासणी केली असता ती गर्भवती राहिल्याचे उघडकीस आलं आहे. यानंतर मुलीच्या आईने चंदननगर पोलीस ठाण्यात तक्रार दाखल केली आहे. या घटनेचा पुढील तपास पोलीस उपनिरीक्षक मुळूक करत आहेत.
