पुणे : शहरातील प्रमुख मार्गांसह राज्य आणि राष्ट्रीय महामार्गांवरील वाहतूक कोंडी सोडविण्यासाठी पुणे महानगर प्रदेश विकास प्राधिकरण (पीएमआरडीए), भारतीय राजमार्ग प्राधिकरण, (एनएचएआय) आणि महानगरपालिका यांच्या संयुक्त विशेष मोहिमेचा दुसरा टप्पा आजपासून (१७ मार्च) सुरू होणार आहे. नवले पूल, सारोळे, सूस रस्ता, हडपसर (शेवाळवाडी), दिवे घाट, नवलाख उंब्रे-चाकण, हिंजवडी-माण, शिक्रापूर या मार्गांवरील अतिक्रमणांवर कारवाई करण्यात येणार आहे. ३० मार्चपर्यंत ही कारवाई मोहीम राबवून वाहतूक कोंडीचा प्रश्न निकाली काढण्यात येणार असल्याचा दावा ‘पीएमआरडीए’कडून करण्यात आला आहे.
शहरासह जिल्हा, राज्य आणि राष्ट्रीय महामार्गांलगत मोठ्या प्रमाणात अतिक्रमण झाल्याने दिवसेंदिवस वाहतूक कोंडी वाढत चालली आहे. त्या पार्श्वभूमीवर ‘पीएमआरडीए’ने संयुक्त कारवाई मोहीम हाती घेतली आहे. महामार्ग व राज्यमार्ग रस्त्यालगत असणारी दुकाने, पत्राशेड, गाळे, टपरी व अनधिकृत बांधकामधारकांना नोटीस बजावून मुदतीच्या आत बांधकाम काढण्याची कल्पना दिली आहे. संबंधितांनी स्वत: अतिक्रमणे काढून प्रशासनाला सहकार्य करण्याचे आवाहन ‘पीएमआरडीए’चे आयुक्त डाॅ. योगेश म्हसे यांनी केले आहे.
संयुक्त कारवाईत कोण?
शहरातील वाहतूक कोंडी सोडविण्यासाठी संयुक्त कारवाई करण्यात येत आहे. त्यामध्ये ‘पीएमआरडीए’, ‘एनएचएआय’, पुणे, पिंपरी-चिंचवड महानगरपालिका, पुणे शहर आणि पोलीस, वाहतूक पोलीस, सार्वजनिक बांधकाम विभाग (पीडब्ल्यूडी), महाराष्ट्र राज्य रस्ते विकास महामंडळ (एमएसआरडीसी), महाराष्ट्र औद्योगिक विकास महामंडळ (एमआयडीसी), महाराष्ट्र विद्युत वितरण महामंडळ (एमएसईबी).
या महामार्गावर कारवाई होणार
पुणे–सातारा रस्ता (नवले पूल ते सारोळे)
सूस रस्ता – हडपसर (शेवाळवाडी) ते दिवे घाट
नवलाख उंब्रे ते चाकण
हिंजवडी परिसर ते माण
तळेगाव ते चाकण ते शिक्रापूर
आतापर्यंत शहरासह जिल्ह्यात ३ ते १३ मार्चपर्यंत राबविण्यात आलेल्या पहिल्या टप्प्यातील कारवाई पुणे ते नाशिक महामार्गावरील चिंबळी (बर्गेवस्ती) ते सांडभोरवाडीपर्यंत जवळपास २९ किलोमीटर परिसरात ८९ हजार ८०० चौरस फूट असलेली ८९८ अतिक्रमणे व अनधिकृत बांधकामे पाडण्यात आली. पुणे-सोलापूर रस्त्याच्या दोन्ही बाजूने अंदाजे ३३ किलोमीटर परिसरात तब्बल एक लाख ४,७०० चौरस फूट (१०४७) बांधकामांवर कारवाई करण्यात आली, तर चांदणी चौक ते पौड रस्त्याच्या बाजूस अंदाजे २१ किलोमीटर परिसरात ५५ हजार ७०० चौरस फूट (५५७) बांधकामे जमीनदोस्त करण्यात आली.