शिक्षण विभागात नोकरी लावण्याचे आमिषाने ४४ जणांची तब्बल ५ कोटींची फसवणूक केल्या प्रकरणी महाराष्ट्र राज्य परीक्षा परिषदेच्या तत्कालीन आयुक्त शैलजा रामचंद्र दराडे यांना अटक करण्यात आली आहे. याप्रकरणी फेब्रुवारी महिन्यात दराडे आणि त्यांचा भाऊ दादासाहेब रामचंद्र दराडे ( रा. इंदापूर) यांच्याविरुद्ध हडपसर पोलीस ठाण्यात गुन्हा दाखल करण्यात आला आहे. याबाबत पोपट सुखदेव सूर्यवंशी ( रा. खाणजोडवाडी, आटपाडी, सांगली) यांनी फिर्याद दिली आहे.
सूर्यवंशी हे शिक्षक असून त्यांच्या नात्यातील महिलेला शिक्षक पदावर नोकरीसाठी ते प्रयत्न करत होते. जून २०१९ मध्ये सूर्यवंशी यांची दादासाहेब दराडे याच्याशी भेट झाली. त्याने बहीण शैलजा दराडे शिक्षण विभागात अधिकारी असल्याचे सांगितले. त्यानुसार मी तुमच्या दोन नातेवाईक महिलांना शिक्षक पदावर नोकरी लावतो असे सांगितले. दादासाहेब याने त्यांना आमिष दाखवून त्यांच्याकडून हडपसरमध्ये २७ लाख रुपये घेतले. काही महिने उलटल्यानंतरही नोकरी न मिळाल्याने सूर्यवंशी यांनी पैसे मागितले. मात्र, त्याने पैसे परत न देता फसवणूक केली.
