“बारणेंनी काळजी करू नये, देवेंद्र फडणवीस हे…”, भाजपच्या आमदाराचे शिवसेनेच्या खासदारांना प्रत्युत्तर

शिवसेना शिंदे गटाचे खासदार श्रीरंग बारणे यांनी पिंपरी-चिंचवड पोलीस आयुक्तालयातील पोलीस कर्मचारी हे सर्वसामान्य नागरिकांना दाद देत नसल्याचा आरोप करत थेट पोलीस आयुक्तांना पत्र दिलं होतं. पोलीस सर्वसामान्यांच्या तक्रारी घेत नाहीत असा आरोप त्यांनी केला. अप्रत्यक्षपणे श्रीरंग बारणे यांनी देवेंद्र फडणवीस यांच्या गृह खात्यावर आरोप केल्याने भाजपचे आमदार अमित गोरखे यांनी प्रत्युत्तर दिले आहे.

हेही वाचा – पिंपरी : ‘बीआरटी’त घुसखोरी करणाऱ्यांवर कारवाई; ‘इतक्या’ कोटींचा दंड केला वसूल

श्रीरंग बारणे हे आमच्याच महायुतीत आहेत. आमच्यासोबत ते काम करत आहेत. मी त्यांच्याशी याबाबत बोलणार आहे. त्यांना कुठे आणि कसली अडचण आहे. हे जाणून घेणार आहे. राज्याचे मुख्यमंत्री तथा गृहमंत्री देवेंद्र फडणवीस हे गृहमंत्रिपद सांभाळण्यास सक्षम आहेत. त्यांच्या नेतृत्वाखाली असे काही घडेल असे मला वाटत नाही. त्यामुळं श्रीरंग बारणे यांनी काळजी करू नये, असं गोरखे यांनी आवाहन करत खोचक टोला लगावला आहे.

हेही वाचा – पाचवी, आठवीत अनुत्तीर्ण विद्यार्थ्यांच्या शुल्काचे काय? ना-नापास धोरणबदलानंतर उपस्थित प्रश्न अनुत्तरित

श्रीरंग बारणेंच्या आरोपांमुळे महायुतीत वादाची ठिणगी पडली आहे. महायुतीत आरोप-प्रत्यारोपांच्या फैरी झडत आहेत. दरम्यान, एका प्रकरणात खासदार श्रीरंग बारणे यांचं म्हणणे पोलिसांनी ऐकून घेतलं नव्हतं. याच प्रकरणात बारणेंचा अहंकार दुखावल्याने पोलिसांवर गंभीर आरोप केल्याची पोलीस वर्तुळात चर्चा आहे. नेमकं ते प्रकरण कुठं आहे. याविषयी देखील चर्चा सुरू झाली आहे.