अनैतिक संबंधाच्या संशयावरून मित्रावर कोयत्याने वार;  कर्वेनगर भागातील घटना

पुणे : ओळखीतील महिलेशी अनैतिक संबंध असल्याच्या संशयावरून एकाने मित्रावर कोयत्याने वार केल्याची घटना कर्वेनगर भागात घडली. या प्रकरणी निलेश श्रीधर ताटे (वय ३५, रा. कर्वेनगर) याच्या विरोधात गुन्हा दाखल करण्यात आला आहे. याबाबत विकास सुनील कांबळे (वय ३३) याने वारजे पोलीस ठाण्यात फिर्याद दिली आहे. विकास कांबळे याचे ओळखीतील महिलेशी अनैतिक संबंध असल्याचा संशय आरोपी ताटेला होता. या कारणावरुन ताटेने कांबळेला शिवीगाळ करून हातावर कोयत्याने वार केला. पोलीस उपनिरीक्षक जाधव तपास करत आहेत.