पुणे : पुणे मेट्रोच्या टप्पा-१ मधील वनाज ते रामवाडी या मार्गिकेची विस्तारित मार्गिका वनाज ते चांदणी चौक आणि रामवाडी ते वाघोली (विठ्ठलवाडी) या प्रकल्पांना राज्य मंत्रिमंडळाने सोमवारी मान्यता दिली आहे.
पुण्याच्या वाहतूक विकासात या प्रकल्पाचे महत्व लक्षात घेऊन मुख्यमंत्री एकनाथ शिंदे यांच्या अध्यक्षतेखाली झालेल्या मंत्रिमंडळाच्या बैठकीत या प्रकल्पांना मान्यता देण्यात आली. उपमुख्यमंत्री अजित पवार यांनी या मेट्रो मार्गिकेसाठी राज्य सरकारच्या माध्यमातून सातत्याने केंद्र सरकारकडे पाठपुरावा केला होता. शिवाय त्यांच्या कार्यालयातील प्रकल्प संनियंत्रण कक्षाच्या माध्यमातून पुण्यासह राज्यातील सर्व महत्वाच्या प्रकल्पांचा नियमित आढावा घेण्यात येत आहे. मान्यता दिलेले प्रकल्प वेळेत पूर्ण व्हावे यासाठीही या कक्षाच्या माध्यमातून प्रयत्न केले जाणार आहेत.
उपमुख्यमंत्री अजित पवार यांनीही, नव्या मार्गिकांना मान्यता दिल्याबद्दल केंद्र सरकारचे आणि राज्य मंत्रिमंडळातील सहकाऱ्यांचे आभार मानले आहेत. या मार्गिकांमुळे नागरिकांना वाहतुकीचा पर्यावरणपूरक पर्याय उपलब्ध होऊन शहरातील वाहतूक कोंडी दूर होण्यास मदत होईल. लवकरच या मार्गिकांचे काम सुरू करण्याचा प्रयत्न असेल, असे श्री.पवार यांनी म्हटले आहे.
हेही वाचा >>>बारामती कुणाचा सातबारा नाही..; विजय शिवतारे लोकसभेच्या रिंगणात
पुणे महानगरपालिकेने महाराष्ट्र मेट्रो रेल कॉर्पोरेशनच्या माध्यमातून शासनाकडे हा प्रस्ताव सादर केला होता. पुणे महानगर मेट्रो रेल प्रकल्प टप्पा-१ मधील वनाज ते रामवाडी या मार्गिकेवरील विस्तारीत मार्गिका वनाज ते चांदणी चौक १.१२ किलोमीटर लांबीची असून या मार्गिकेवर २ स्थानके प्रस्तावित आहेत. रामवाडी ते वाघोली (विठ्ठलवाडी) मार्गिकेची लांबी ११.६३ किलोमीटर असून या मार्गिकेवर ११ स्थानके प्रस्तावित आहेत. एकूण १२.७५ कि.मी. लांबी आणि १३ उन्नत स्थानके असलेल्या ३ हजार ७५६ कोटी ५८ लाख रुपयांच्या पूर्णतः उन्नत मेट्रो रेल्वे प्रकल्पाची महामेट्रोमार्फत अंमलबजावणी करण्यास मान्यता प्रदान करण्यात आली आहे. यात केंद्र व राज्य सरकारचा सहभाग प्रत्येकी ४९६ कोटी ७३ लाख (१५.४० टक्के), केंद्रीय कराच्या ५० टक्के रकमेसाठी केंद्र व राज्य सरकारचे दुय्यम कर्ज प्रत्येकी १४८ कोटी ५७ लाख रुपये (४.६० टक्के), द्विपक्षीय, बहुपक्षीय संस्थांचे कर्जसहाय्य१ हजार ९३५ कोटी ८९ लाख रुपये (६० टक्के) अशाप्रकारे ३ हजार २२६ कोटी ४९ लाख रुपये प्रकल्प किंमत केंद्र सरकारच्या अनुदानासाठी पात्र असणार आहे.
याशिवाय राज्य कराकरिता राज्य सरकारचे बिनव्याजी दुय्यम कर्ज २५९ कोटी ६५ लाख रुपये, भूसंपादनासाठी राज्य सरकारचे बिनव्याजी दुय्यम कर्ज २४ कोटी ८६ लाख रुपये, राज्य सरकारचे बिनव्याजी दुय्यम कर्ज ६५ कोटी ३४ लाख रुपये, पुणे महापालिकेचे जमिनीसाठी योगदान २४ लाख रुपये, बांधकाम कालावधी व्याजाकरिता राज्य सरकारचे बिनव्याजी दुय्यम कर्ज १८० कोटी रुपये असणार आहे.
हेही वाचा >>>नीलेश लंकेंनी घेतली अमोल कोल्हेंची भेट; कोल्हे म्हणाले, “आमच्या दोघांमध्ये राजकीय…”
प्रकल्पासाठी पुणे महापालिकेने जमिनीसाठी द्यावयाच्या योगदानाकरिता २४ लाख रुपयांचे वित्तीय सहाय्य /जमीन महामेट्रोला उपलब्ध करून देण्याबाबत पुणे महापालिकेला निर्देश देण्यात आले आहेत. या प्रकल्पातील राज्य सरकारची समभागाची ४९६ कोटी ७३ लाख रुपये महामेट्रोला उपलब्ध करून देण्यास मान्यता प्रदान करण्यात आली आहे.
शहराचा औद्योगिक विकास आणि विस्तारही वेगाने होत आहे. वाढत्या लोकसंख्येला पर्यावरणपूरक सार्वजनिक वाहतूक सुविधा देण्याचा शासनाचा प्रयत्न आहे. पुणे आणि पिंपरी- चिंचवड शहरात मेट्रोचे जाळे निर्माण झाल्यास शहरातील वाहतूक कोंडी दूर होवून प्रदूषणाचे प्रमाणही कमी होणार आहे. नव्याने मंजूर झालेल्या मेट्रो मार्गिकांमुळे उपनगरातील नागरिक वेगवान वाहतुकीद्वारे शहराशी जोडले जातील, असा विश्वास उपमुख्यमंत्री अजित पवार यांनी व्यक्त केला आहे.
