पुण्यातील पाणीकपातीचा निर्णय १५ दिवस लांबणीवर

खडकवासला धरणातील पाणीसाठा ५० टक्क्य़ांच्या आसपास असूनही पुण्यातील पाणीकपातीचा निर्णय आणखी १५ दिवस लांबणीवर टाकण्याचा निर्णय शनिवारी कालवा समितीच्या झालेल्या बैठकीत घेण्यात आला. येत्या १०-१५ दिवसांतील पावसाची परिस्थिती पाहून पाणीकपातीचा निर्णय घेण्याचे सांगत पालकमंत्री गिरीश बापट यांनी पाण्याबाबत शहरी आणि ग्रामीण असा भेद न करता सर्वानीच काटकसरीने वापर करण्याचे आवाहन केले.
गिरीश बापट यांच्या अध्यक्षतेखाली कालवा समितीची विधान भवन येथे बैठक झाली. जलसंपदा राज्यमंत्री विजय शिवतारे, सामाजिक न्याय राज्यमंत्री दिलीप कांबळे, खासदार अनिल शिरोळे, अमर साबळे, महापौर दत्ता धनकवडे, महापालिका आयुक्त कुणाल कुमार, जिल्हाधिकारी सौरभ राव, पोलीस आयुक्त के. के. पाठक यांच्यासह जिल्ह्य़ातील आमदार या बैठकीस उपस्थित होते.
पाण्याबाबत शहरी आणि ग्रामीण असा भेद न करता सर्वानीच काटकसरीने वापर करण्याचे धोरण स्वीकारावे, असे आवाहन बापट यांनी केले. पर्वती जलकेंद्रातून होणारी गळती रोखण्यासाठी महापालिकेने तातडीने पावले उचलावीत. मुंढवा जॅकवेलचे काम पूर्ण करण्याबरोबरच खडकवासला बंदनलिकेचे काम मार्गी लावावे. शहरातील जुन्या विहिरींचे पुनरुज्जीवन केल्यास पिण्याखेरीज पाणी उपयोगात आणता येईल. मात्र, महापालिकेने बांधकामांसाठी त्याचप्रमाणे गाडय़ा धुण्यासाठी होत असलेल्या पिण्याच्या पाण्याच्या वापरावर र्निबध घालणे आवश्यक आहे, असेही बापट यांनी सांगितले.
राज्य सरकारचे धोरण पिण्याच्या पाण्याला आहे. मात्र, खरीप हंगामात आलेले पीक पाण्याअभावी मरू नये ही बाब ध्यानात घेऊन शेतीसाठी कालव्यातून पाणी सोडण्यात येत आहे. पावसाच्या परिस्थितीचे गांभीर्य लक्षात घेऊन १५ दिवसांत पुन्हा कालवा समितीची बैठक घेण्यात येणार आहे. मात्र, आपत्कालीन परिस्थिती ओढवली तर त्यासंदर्भात तातडीने निर्णय घेण्याचे अधिकार पालकमंत्र्यांना देण्यात यावेत, असा निर्णय या बैठकीमध्ये झाला.
जलसंपदा विभागातर्फे जिल्ह्य़ातील धरणांमध्ये असलेल्या पाणीसाठय़ाची माहिती देण्यात आली. खडकवासला धरणामध्ये एकूण १५ अब्ज घनफूट (टीएमसी) पाणीसाठा आहे. त्यातील पुण्यासाठी ११.३७ टीएमसी पाणीसाठा देता येणे शक्य आहे. शहराला दोनवेळा पाणीपुरवठा करण्यासाठी १४ टीएमसी पाणीसाठा आवश्यक आहे. त्यामुळे दिवसाआड पाणीपुरवठा केला तरच उपलब्ध पाणीसाठा पुरेल. मात्र, सिंचनासाठी पाणीपुरवठा करता येणार नाही, अशी माहिती जलसंपदा विभागातर्फे देण्यात आली. हवामानाच्या अंदाजानुसार ४ सप्टेंबपर्यंत मोठय़ा प्रमाणावर पाऊस अपेक्षित नाही. मात्र, परतीच्या मान्सूनचा प्रवास लांबल्यास हा पाऊस महत्त्वाचा ठरू शकतो, अशी माहिती हवामान विभागाच्या मेधा खोले यांनी दिली.