पिंपरी : पिंपरी-चिंचवड शहरातील शंभरहून अधिक सदनिका असलेल्या गृहनिर्माण सोसायट्यांना सांडपाणी प्रक्रिया प्रकल्प (एसटीपी) कार्यान्वित करण्याबाबत महापालिकेने तीनवेळा नोटिसा बजावूनही १८४ साेसायट्यांमधील ‘एसटीपी’ बंदच असल्याचे समाेर आले आहे. विविध कारणे पुढे करून ‘एसटीपी’ सुरू ठेवण्यास नकार दिला जात आहे. ‘एसटीपी’ सुरू न करणाऱ्या सोसायट्यांचा पाणीपुरवठा खंडित करण्याचा इशारा महापालिकेने दिला आहे.
पिंपरी-चिंचवड शहर चारही बाजूने विस्तारत असून लाेकसंख्याही झपाट्याने वाढत आहे. त्यामुळे पाण्याची मागणीही वाढू लागली आहे. सध्यःस्थितीत शहरवासीयांना ६२० ते ६३० दशलक्ष लीटर (एमएलडी) पाणी एका दिवसाला दिले जात आहे. मात्र, त्यानंतरही शहरातील अनेक मोठ्या साेसायट्यांना टँकरच्या पाण्याचा आधार घ्यावा लागत आहे. त्यामुळे काही साेसायट्यांचा पाण्याचा दरमहा खर्च सव्वा लाख ते दीड लाख रुपयांवर गेला आहे. एकत्रित बांधकाम आणि विकास नियमावलीनुसार (यूडीसीपीआर) वीस हजार चौरस मीटरपुढील क्षेत्रफळावरील, शंभर सदनिका आणि दररोज वीस हजार लिटर पाण्याचा वापर करणाऱ्या गृहनिर्माण सोसाट्यांना पाण्याचा पुनर्वापर व पुनर्चक्रिकरण करणे बंधनकारक करण्यात आले आहे. शहरात ४५६ मोठ्या गृहनिर्माण सोसायट्या आहेत. त्यांपैकी २६४ सोसायट्यांमधील सांडपाणी प्रक्रिया प्रकल्प (एसटीपी) कार्यान्वित आहेत. तर, ‘एसटीपी’ सुरू करण्याचे वारंवार आवाहन करूनही १८४ साेसायट्यांमधील ‘एसटीपी’ विविध कारणांनी बंदच आहेत.
पाणीपुरवठा खंडित करणार
‘एसटीपी’ बंद असलेल्या ८४ साेसायट्यांना पहिली, ५० साेसायट्यांना दुसरी आणि ५० साेसायट्यांना तिसरी नाेटीस महापालिकेने बजाविली आहे. त्यानंतरही या साेसायट्यांनी खर्चासह विविध कारणे देत ‘एसटीपी’ बंद ठेवले आहेत. तर, आठ साेसायट्यांनी महापालिकेच्या पथकास सोसायटीमध्ये प्रवेश दिला नसल्याचे समाेर आले आहे. या सोसायट्यांमधील पिण्याचा पाणीपुरवठा खंडित करण्यात येणार असल्याचे महापालिकेने सांगितले आहे.
‘एसटीपी’ सुरू करण्याबाबत मोठ्या गृहनिर्माण सोसायट्यांना वारंवार पत्र देण्यात आले आहे. ‘एसटीपी’ बंद असलेल्या साेसाट्यांना तीनवेळा नाेटिसा दिल्या आहेत. त्यानंतरही ‘एसटीपी’ सुरू न केल्याने पाणीपुरवठा खंडित केला जाणार आहे, असे पिंपरी-चिंचवड महापालिकेचे मुख्य अभियंता संजय कुलकर्णी यांनी सांगितले.
