यंदाच्या गणेशोत्सवात पोलिसांवरील ताण कमी

गणेशोत्सवापूर्वी महिनाभर आधी दरवर्षी पोलिसांकडून बंदोबस्ताची आखणी करण्यात येते. उत्सवाच्या कालावधीत शहरात जवळपास दहा ते बारा हजार पोलिसांचा बंदोबस्त तैनात असतो. विसर्जन मिरवणुकीच्या दुसऱ्या दिवशीपर्यंत शहरातील बंदोबस्त कायम असतो. यंदाच्या वर्षी उत्सवावर करोनाचे सावट आहे. त्यामुळे शहरातील मानाच्या मंडळांसह सर्वच मंडळांनी उत्सव अतिशय साधेपणाने साजरा करण्याचा निर्णय घेतला आहे. वैभवशाली परंपरा असलेल्या पुण्यातील गणेशोत्सवातील आरास, देखावे पाहण्यासाठी राज्यातून नव्हे तर देशभरातील भाविक उत्सवाच्या कालावधीत आवर्जून हजेरी लावतात. उत्सवाच्या कालावधीत होणारी गर्दी विचारात घेऊन शहराच्या मध्यभागात मोठा बंदोबस्त तैनात करावा लागतो.

यंदाच्या वर्षी गणेशोत्सवात नेहमीप्रमाणे बंदोबस्त लावावा लागणार नाही. दरवर्षी उत्सवाच्या काळात बंदोबस्तासाठी राज्य राखीव पोलीस दलाची तुकडी तैनात करण्यात येते. चौकाचौकात गर्दीवर लक्ष ठेवण्यासाठी मनोरे उभारण्यात येतात. यंदाच्या वर्षी उत्सवाच्या कालावधीत मानाची मंडळे सोडून अन्य भागात गर्दी होण्याची शक्यता कमी आहे.

मंडळांनी सामाजिक जबाबदारीचे भान राखून यंदा उत्सव अतिशय साधेपणाने साजरा करण्याचा निर्णय घेतला आहे. पोलिसांनी केलेल्या आवाहनाला मंडळांनी सकारात्मक प्रतिसाद दिला आहे. उत्सवाच्या कालावधीत गर्दी होणार नाही, याची काळजी घ्यावी लागणार आहे.वैद्यकीय तज्ज्ञांनी दिलेल्या सूचनांचे पालन करावे लागणार आहे. 

– मितेश घट्टे, पोलीस उपायुक्त, विशेष शाखा, पुणे पोलीस