लोकसत्ता प्रतिनिधी
पुणे: घरात राहू नको, असे सांगितल्याने चिडलेल्या घरजावयाने सासूच्या अंगावर गरम पाणी फेकून तिला मारहाण केली. सासूचे डोके फरशीवर आपटल्याने तिचे दात पडले. या प्रकरणी घरजावयाला खडकी पोलिसांनी अटक केली.
सुजाता कैलास शिंदे (वय ५०) असे जखमी झालेल्या सासूचे नाव असून त्यांच्यावर ससून रुग्णालयात उपचार सुरू असल्याची माहिती पोलिसांनी दिली. या प्रकरणी खडकी पोलिसांनी महेंद्र सिद्धनाथ तोरणे (वय २५, रा. आर्मी क्वार्टर, सर्वत्र विहार, मुळा रस्ता, खडकी) याला अटक करण्यात आली आहे. याबाबत सासू सुजाता शिंदे यांनी फिर्याद दिली आहे. सुजाता शिंदे खडकीतील दारूगोळा कारखान्यात कामाला आहेत. शिंदे यांची मुलगी आणि जावई तोरणे त्यांच्याकडे राहायला आहे. जावई तोरणे याच्याशी त्यांचा वाद झाला. शिंदे यांनी त्याला घरात राहू नको, असे सांगितले.
हेही वाचा… पुणे : ‘या’ अभ्यासक्रमाच्या विद्यार्थ्यांना मिळणार आठ हजार रुपये विद्यावेतन
त्यानंतर तोरणेने सासूच्या अंगावर गरम पाणी ओतले. सासूचे डोके फरशीवर आपटले. मारहाणीत सासूचे दोन दात तुटले. सासू सुजाता शिंदे यांच्या चेहऱ्यावर गरम पाणी फेकल्याने त्या भाजल्या आहेत. त्यांच्यावर उपचार सुरू आहेत. पोलीस उपनिरीक्षक बेंदगुडे तपास करत आहेत.
